En pleno proceso de divulgación e de involucración atópase o Concello de Muxía co seu proxecto "Muxía. Camiñando cara o mar". Este pasado martes 6 de febreiro tivo lugar a primeira xuntanza de traballo organizada polo ente promotor, o Concello de Muxía, o alcalde da vila, Félix Porto, que explicou as liñas de traballo e os obxectivos do proxecto a uns 50 empresarios. Porto fixo un especial fincapé no papel que xogan os sectores produtivos para o aproveitamento desta iniciativa de dinamización turística.

O rexedor, que avanzou que xa está traballando nun novo proxecto que complementará ao que acaba de comezar tamén a través dos fondos GAC, presentou aos responsables do equipo de traballo que se ocupará da execución do proxecto, a empresa carballesa Abertal Networks. O seu representante, Manuel Pan, explicou o plan formativo programado para os empresarios, especialmente do sector hostaleiro, pero subliñou que a oferta podería ser modificada para atender as inquedanzas particulares dos participantes.

Unha necesaria cooperación

Nesta primeira sesión de traballo, falouse da importancia de cooperar para a creación dunha marca e dun produto turístico diferenciador, poñendo en valor os recursos do territorio e, especialmente “descubrindo ao mundo tesouros ocultos coma Touriñán, onde di adeus o último raio de sol na Europa continental”.
Manuel Pan tamén explicou que é necesaria a implicación dos profesionais na creación dunha rede de traballo que consolide Muxía como marca e aumente a súa cuota de mercado no sector turístico. Neste sentido, o responsable de Abertal recordou que o proxecto “tamén está aberto á xente que esté pensando en desenvolver un proxecto emprendedor e incluso os desempregados que están a buscar formación para ter máis posibilidades de inserción laboral”.

Mellorando os servizos turísticos

Pola súa banda, Marta Rodríguez Casas, membro do equipo técnico do proxecto, falou da importancia de elaborar unha proposta de turismo experiencial e de traballar na mellora da calidade do servizo. Segundo explicou, Muxía conta con moitos dos elementos que busca o turista que visita Galicia, entre os que destaca “contar cun treito do Camiño Xacobeo totalmente asentado, un dos santuarios máxicos do país, paisaxe natural, gastronomía, faros e lugares emblemáticos coma Touriñán”, elementos que, según a experta, “cómpre ordenar, coñecer e presentar ao que nos visita”.

Formación para hostaleiros

Pola súa banda, os empresarios aportaron ideas neste primeiro encontro e mostraron o seu interese por traballar cun obxectivo común, o de incrementar o turismo e, con isto, a mellora da economía local. Boa parte deles asinaron o seu compromiso formalizando a inscripción para participar nos cursos que comezarán de inmediato.

Novas relacionadas

• Xaneiro 2013: Muxía xa camiña cara o mar cunha nova marca turística.
• Marzo 2012, presentación do Proxecto: Muxía xa camiña ao solpor cara o mar dende Touriñán.
• Muxía garda o seu Patrimonio Cultural Inmaterial no Proxecto Buserana.
• Os Hosteleiros de Santiago promoverán o Camiño a Fisterra e Muxía.

Fonte

• Concello de Muxía.