O GDR lamenta a perda de numerosos fondos por erros na xestión

Costa da Morte

10:11 09/03/15

O pasado xoves tivo lugar unha importante Xunta Directiva da asociación Costa da Morte GDR, na que un dos puntos principais era a analizar o novo Programa Leader 2014-2020. I é que xa se sabía que os fondos europeos ían baixar, e así o constatou o novo PDR de Galicia. onde hai unha importante redución de fondos Leader e de grupos. Algo que non entenden dende a Xunta directivaz, pois consideran que “nun momento en que a economía está empezando a “despegar” non se entendería unha redución ás empresas do rural das axudas do Programa Leader”.

"Se hai menos fondos, perde o territorio", recoñece o propio xerente do GDR.

Nivel de execución e retrasos

Ademais, a xuntanza serviu para facer balance do nivel de execución do actual Programa Leader 2007-2013, e as conclusións non foron moi positivas.

En datos, o GDR leva aprobados en firme 94 proxectos por unha inversión de 9.053.355,61€ e unha subvención de 4.016.168,19€, con un total de emprego consolidado de 212 empregos e creado 74 empregos. E o nivel execución ata o de agora non é malo:

Ano 2010: 81,22%;
Ano 2011: 99,91%;
Ano 2012: 97,45%;
Ano 2013: 97%;
Ano 2014: 99,78%.

Pero dende a entidade lamentan varios puntos que non facilitan a xestión dos fondos. Primeiramente, recoñecen que se perderan os fondos do 2008 e 2009, pois a entidade, despois do proceso de selección de persoal comezou a traballar en novembro de 2009 e ao estar anualizada a financiación do programa e non poder traspasar o sobrante dun ano para o seguinte.

Lembran ademais que empezaran, daquela, a traballar sen un manual de procedemento e sen un programa informático de xestión (“aínda hoxe non temos ningún deles”, recoñecen dende o grupo). Apuntan ademais que “houbo retrasos en AGADER á hora de verificar expedientes, emitir resolucións e de revisar certificacións (posiblemente por falla de persoal)”.

Por se foran poucos atrancos, “no 2014 non se permitiu que os anticipos de subvención computasen á hora de xustificación da anualidade e sen embargo houbo outros departamentos que sí o permitiron, co que se perdeu de xustificar bastantes fondos a nivel de toda Galicia”. Por iso, consideran que “se houbese un sistema de traspaso de fondos sobrantes entre grupos poderíase haber certificado moito mais a nivel de toda Galicia”.

Novo PDR 2014-2020

O MAGRAMA informaba aos GDR o pasado mes de novembro, sobre o Novo PDR do 2014-2020. Hai unha asignación de fondos para o Leader en Galicia no Período 2014-2020 de 84 millóns de € fronte aos 149 M€ do actual período 2007-2013, é decir unha baixada de 65 M€ o que equivale ao 43,6%, a pesares de que para o novo período do Fondos FEADER para Galicia non baixan (tal como sucede nas outras CCAA) senón que aínda suben.

Dado que a UE fixa para cada grupo un mínimo de 3,75 M€, habería unha redución drástica de grupos pasando dos actuais 31 a un número entre 17 e 22. Veremos que acontece cos dous grupos que atinxen á nosa zona, pois os territorios pasarían a ser moito mais grandes e terían menos fondos o que supón un menor apoio aos promotores e estarían mais alonxados das sedes dos GDRs.

Peticións

A entidade ratificou así a que apoiará ás Asociación de GDRs de Galicia na petición de solicitar á Xunta de Galicia que manteñan para o novo período os mesmos fondos que había para o actual (149 Millóns de €). E que non se reduzan o número de GDR actuais, e en caso de reducir grupos que se usasen criterios obxectivos.

Proxectos Aprobados en firme

Ademais, a xuntanza servíu para dar conta dos novos proxectos en marcha:

1.- Melloras tecnolóxicas para a xestión do parque de alimentación, en Grille (Mazaricos). O orzamento ascende a 25.820,00 €, e o importe da axuda sitúase nos 9.037,00 €, o que supón un 35% sobre o total.
2.- Compra de procesadora forestal, en Calabanda (Vimianzo). O orzamento ascende a 120.705,00 €, e o importe da axuda sitúase nos 42.910,63 €, o que supón un 35% sobre o total.
3.- Mellora tecnolóxica de empresa de servizos agrícolas e forestais, Berdoias (Vimianzo). O orzamento ascende a 679.970,00€, e o importe da axuda sitúase nos 237.989,73 € ( 135.354,34€ en firme e 102.635,39€ en reserva), o que supón un 35% sobre o total.

Proxectos Aprobados en reserva:

1.- Creación de pistas de padel en Vimianzo. O orzamento ascende a 358.683,56€, e o importe da axuda sitúase nos 125.539,24€, o que supón un 35% sobre o total.
2.- Creación de consulta especializada de cardioloxía en Vimianzo. O orzamento ascende a 60.850,30€, e o importe da axuda sitúase nos 21.297,61€, o que supón un 35% sobre o total.

Proxectos Revisados

“Mellora tecnolóxica en explotación de vacún leiteiro” (Mazaricos).
“Compra de maquina colleitadora” (Mazaricos)
“Creación dun centro de intermediación comercial” (Cee)
“Creación dunha escola de baile” (Camariñas)
“Construcción dun estercoleiro en explotación gandeira de carne” (Mazaricos)
“Adquisición de equipo de control de celo de vacuno” (Mazaricos)
“Modernización de empresa de servicios” (Vimianzo)
“Creación novo establecemento de hostalería” (Fisterra)
“Adquisición de cisterna de purín con inxectores” (Mazaricos).

O montante total de inversión admitida destes 9 proxectos é de 1.174.880,60 €, e a subvención prevista ascende a 411.819,78 €.
Estes nove proxectos foron enviados a AGADER e agora estase á espera de recibir a verificación do ICE.

Ademais, paralelamente a Deputación de A Coruña concedeu ao GDR unha axuda de 3.349,60€ para un proxecto de Divulgación e Posta en Valor do territorio GDR – Costa da Morte.