A Xunta lembra a obrigatoriedade de limpar os terreos forestais próximos ás vivendas antes do 31 de maio

A Xunta lembra a obrigatoriedade de limpar os terreos forestais próximos ás vivendas antes do 31 de maio

12:21 19/05/21

A partir do mes de xuño, todas as parcelas forestais situadas nas faixas a 50 metros das vivendas deben estar perfectamente desbrozadas. Así o esixe a Lei de prevención e defensa contra os incendios forestais de Galicia, de aí que a Xunta faga un chamamento a todos os propietarios de terreos forestais.

A Xunta lembrou ademais que a partir de xuño a responsabilidade subsidiaria da xestión da biomasa preto das casas corresponde xa aos concellos, que serán os encargados de obrigar aos veciñ@s a cumprir a lei.

Son poucos os Concellos da Costa da Morte implicados con esta circunstancia. Nos últimos anos apenas colleitamos chamamentos públicos dos Concellos de Camariñas, A Laracha, Carballo, Santa Comba ou Ponteceso, se ben a meirande parte xa contan coa plataforma Xesbío, unha ferramenta para xestionar a tramitación administrativa da limpeza de franxas e comunicarse cos donos das fincas que están dentro desas faixas.

Outros concellos están adheridos ao programa de limpeza da Xunta, a través do cal é a Xunta a que se fará cargo da limpeza das súas parecelas, mentres os titulares das terras só terán que pagar 35 euros por cada mil metros cadrados (é dicir, 350 euros por hectárea), un prezo fixo axustado e vantaxoso con respecto aos prezos de mercado.