Despois de dúas fins de semana cargadas de Entroido a #AxendaCostadaMorte volve á normalidade. Rosalía de Castro, o teatro e o festival Incluson de Aloumiños serán as principais citas culturais desta fin de semana na Costa da Morte. Antes de facer un repaso cita por cita dámoslle un vistazo ás previsións metereolóxicas de 4gotas.com que semella que son boas. "As xeadas e o frío acompañarannos na mañá de hoxe. Xa ao mediodía notarase unha suba das temperaturas para dar paso a un tempo agradable que nos acompañará durante o sábado e, sobre todo, o domingo. Hoxe alternarán as nubes cos claros no ceo e nas primeiras horas da mañá - ou mesmo antes do amencer - caerán un par de chaparróns moi puntuais. Non choverá polo día, pero é posible que de cara a noite cheguen algúns orballos espallados. Mañá o día amencerá con moitas nubes en toda a Costa da Morte que poden traer algún orballo durante a mañá, especialmente no interior. Ao mediodía remitirán estas choivas e abriranse tímidos claros, sobre todo entre Fisterra e Muros. O domingo nese litoral sur predominará o sol, quedando o resto da Costa da Morte con algo máis de nubes pero cunha temperatura moi agradable". Entroido

• Ainda quedan pola comarca pequenos restos do entroido. Concretamente será na praza Castelao de Corcubión, onde mañá sábado teña lugar o enterro da Sardiña Escolar. A cita, que comeza ás 19:15 horas.

O mes de Rosalía de Castro

• A biblioteca municipal de Ponteceso acolle mañá sábado, ás 18 horas, un recital aberto a Rosalía de Castro. O escritor Miguel Anxo Mato e o filólog Pepe Alborés falarán da escritora e tamén actuarán os membros do grupo Inllar.
• Rosalía de Castro tamén estará moi presente este domingo na visita guiada a Moraime que organiza a asociación Turismo Muxía Natural, dentro do programa “Febreiro, mes das pegadas de Rosalía de Castro nas terras de Muxía”. A cita comeza ás 17 horas e é preciso anotarse.

Teatro

• En Carballo continúan os Venres Culturais. Nesta ocasión, o pazo da Cultura carballés acolle hoxe, ás 21 horas, aos membros da compañía de Huesca Producciones Viridiana, que presentan o espectáculo "Ligeros de equipaje. Crónica de la retirada". A través de dous actores que interpretan a preto de cincuenta personaxes, ofrecen un traballo emocionante e impactante.  O prezo da entrada é de 4 € con prezo especial con desconto para estudantes e maiores de 65 anos de 3 €
• Os máis pequenos teñen unha cita mañá sábado, ás 18 horas,  co Febreiro Pequeneiro de Vimianzo onde poderán ver "Espantallo amigo"; unha adaptación teatral  de Os Quinquilláns da obra homónima de Xosé Neira Vilas, un dos fitos máis importantes da literatura infantil galega.
• Teatro en Muros. Tamén o sábado, o auditorio do Centro Cultural de Muros acolle o espectáculo da compañía Talía teatro, “Demolición”, no que o público adulto poderá gozar durante unha hora e media dun traballo actoral impecable. A cita comeza ás 21:30 horas. O prezo das entradas é de 3,5€.

Concertos

• Esta noite, a Sala A Ventana de Laxe acolle o concerto, a partir das 23:30 horas, de David Feito, un dos guitarristas de El Sueño de Morfeo que salta en solitario con Vapor.
• María Fumaça leva o domingo ata Carballo o seu espectáculo "Xiqui Xoque, Fiú Fiú!" un concerto-espectáculo para celebrar a vida que ademais aproveita a Asociación Aloumiños para organizar o festival Incluson a partir das 17.00 horas e dar a coñecer o seu labor.

Máis información

• quepasanacosta.gal/axenda/.

Fonte

• Redacción QPC (info@quepasanacosta.com)