Continúan as citas festeiras na Costa da Morte, mais segundo o parte costeiro de 4gotas.com parece que un dos principais protagonistas da fin de semana será o frío. Así que co abrigo posto, os veciños e veciñas da bisbarra poderán desfrutar de citas como a Festa da Pataca en Coristanco, o Xiria Pop de Carballo e do verbeneo. Despois destes días de vento de sur e con borrascas ao norte que achegaron algunha chuvia nas noites e bastante mar, con ondas de ata 5 metros, achégase un anticiclón, pero non se colocará no Cantábrico, se non que o fará moi ao norte e o que arrastrará será unha masa de aire frío desde latitudes moi ao norte (desde o Ártico) Deste xeito teremos que falar dun adianto do outono. Será unha fin de semana fría, con vento do norte e coa chegada de chaparróns moi puntuais. Na madrugada e na mañá de hoxe venres os chaparróns (4-5 e de só 10 minutos de duración) afectarán ao norte da Costa e ao interior. No litoral oeste (entre Fisterra e Muros) non debería chover. En todos os puntos da Costa da Morte haberá moitos momentos de sol. Na tarde de hoxe non se esperan choivas en ningún punto da bisbarra. No sábado de madrugada e durante a mañá poderían repetirse eses ballóns, pero de xeito aínda máis illado. Caerán sobre todo pegados ao litoral norte e como moito serán 2-3 en todo o sábado. Tamén haberá moitos momentos de sol. O sábado á tarde, outra vez, non debería chover. No domingo o risco de chuvia aínda non está 100% claro, pero apenas debería caer, pero si que é posible que 1-2 chaparróns ao longo de todo o día poidan caer no litoral norte. Todos os días as temperaturas serán semellantes (o domingo un chisco máis altas), con frío no interior nas noites (mesmo algunha xeada puntual) e fresco nos mediodías (18 graos no litoral norte e no interior e uns 20 no litoral oeste).  

Festival Xiria Pop

• O Xiria Pop - o festival dos festivais da Costa da Morte - cumple 2o anos. Serán oito as bandas que suban ao escenario da Sala Dublín entre hoxe e mañá, nuns días nos que ademais, como novidade, a música compartirá protagonismo coa poesía.

Festa da Pataca en Coristanco

• Esta fin de semana - 16 e 17 de setembro - ten lugar a XXXVII Festa da Pataca de Coristanco.  Unha cita singular na que a pregoeira será Lupe Blanco, a nova regueifiera de Bergantiños.

Festas

• Fátima de Cambeda. En Cambeda, Vimianzo, honran estes días á virxe da Fátima. Despois da verbena de onte, hoxe será o turno das orquestas Ciudad Cristal e Ritmo Joven.
• Festas de Castriz. Hoxe arrancan as festas de Castriz con forza, coa festa do Calimocho e o Combo Domicano. Mañá será día de Santa Rita e o domingo, macro sesión vermú e verbena.
• Festas en Carnota. En Carnota celebran hoxe e mañá as festas das Dolores e da Virxe do Carme. Mañá actuarán o grupo Soprano e a disco móbil Fabrik.
• Festas en Sardiñeiro. En Sardiñeiro (de Arriba) están mañá e o domingo de festas. Haberá verbena, sorteos e incluso degustación de callos.
• Festas das Dores en Verdillo. A orquesta Ceniza será a encargada de amenizar a sesión vermú e a verbena que hai mañá en Verdillo.
• Festas de Coluns. Na parroquia de Coluns, en Mazaricos, están mañá e o domingo de festas nas que haberá moita música a carggo das orquestas Triunfo e Estrellamar.
• Festas de Rus. Na parroquia carballesa de Rus honran mañá a santa Eufemia e o domingo a san Mateo de Rus (día no que haberá unha gran pulpada).

Exposicións

• Castelo de Vimianzo. A fortaleza así como a súa mostra de artesanía ao vivo pódese visitar todos os días da semana en horario de 10:30 a 14 horas e de 16 a 20:30 horas. Visitas guiadas gratuítas: sábado e domingo ás 12 e ás 19 horas.
• Conxunto etnográfico do Mosquetín. Visita guiada e demostración do funcionamento dos batáns e muíños todos os sábados e domingos ás 13 e ás 18 horas.
• Sala Antón Mouzo. A artista Teresa Candal expón Matriz, unha mostra pictórica “metáfora do nacemento” na que o corpo da muller é o protagonista. Pódese ver na sala Antón Mouzo, na Casa da Cultura de Vimianzo, até o 20 de setembro. O horario en agosto é de luns a venres de 9 a 15 horas; e en setembro de luns a venres de 9 a 20 horas e os sábados de 9 a 13 horas.
• As Torres do Allo, en Zas, abre venres, sábados e domingos e festivos  (de 11 a 19 horas). Ademais, o pazo acolle unha mostra de pezas de Olería de Buño e ofrece visitas guiadas gratuitas ás 13 e ás 17 horas.
• No dolmen de Dombate ofrécense visitas guiadas todos os días de 10:30 a 14 e de 16 a 18:30 horas.

Outras citas

• Cine en Fisterra. Hoxe, ás 20:30 horas, o salón de actos do concello de Fisterra acolle a proxección da película "Encallados". A cita está dirixida ao público adulto.
• Encontro Literario. Hoxe, mañá e o domingo terá lugar en Fisterra o I encontro literario internacional que leva por título “Atlántico e Mediterráneo: Mares de Palabras”, organizado polo concello xunto co grupo editorial Sial Pigmalión, a asociación cultural Concilyarte e o centro galego de Valencia.
• O Encaixe no Camiño. Dende hoxe e ata o domingo celébranse en Camariñas unha xornadas sobre "O Encaixe no Camiño". Durante estes días a vila conserveira vestirase de medieval e terá un programa completísimo con rutas gastro-medieval polos bares, recreacións históricas teatrais, citas para os peques, música…
• Concerto no Semáforo. Hoxe, ás 2o horas, haberá un novo show da Bakin’Blues no Semáforo de Fisterra con Edu Manazas e LAR Legido como convidados.
• Federico Pérez en Mazaricos. "A noite do capador" é o título do espectáculo que ofrece mañá, ás 22 horas, Federico Pérez no auditorio da Casa da Cultura da Picota.
• I Certame Gandeiro Cabalar. O antigo recinto da feira de Santa Comba acolle o domingo un certame estará cargado de actividades entre as que se atopan un concurso cabalar de razas puras e cruzadas, exhibicións ecuestres, un espectáculo de danza a cabalo que terá lugar ás 18 horas e unha ruta cabalar polo municipio xalleiro.
• XXII Festa dos Maiores de Cee. O domingo celébrase a xuntanza de confraternidade de maiores de Cee no pavillón municipal de Cee.

Fonte

• Redacción QPC (info@quepasanacosta.com)