Primeira fin de semana de abril, xa coa cabeza na Semana Santa, pero con moitas cousas por facer. Pero antes, lemos o parte meteorolóxico costeiro que nos achegan os compañeiros 4gotas.com:
Esta fin de semana, teremos que dividir a Costa da Morte en dúas partes. Unha ao norte de Muxía e outra ao sur.
Ao sur teremos que falar de chuvias persistentes e por momentos intensas tanto o venres coma o sábado e de orballos no domingo pola mañá, remitindo na tarde. Haberá vento forte o venres na madrugada e na mañá, ademais do domingo pola mañá.
Ao norte de Muxía esas frontes chegarán máis desfeitas e só falaremos de chubascos na madrugada e primeiras horas do venres, e na madrugada e ata o mediodía do sábado. Tamén haberá vento forte do sur na madrugada e mañá do venres e do sudoeste boa parte do domingo.
As temperaturas serán suaves, tanto as mínimas que non baixarán dos 10ºC no interior e dos 12 na costa, coma as máximas que quedarán nos 14ºC na parte sur, e chegarán ata os 16 na parte norte da Costa.

Xa en materia cultural, temos unha fin de semana completa, con danza, cine, monólogos, teatro, foliadas, concertos, andainas… E comezamos o repaso polo venres, cunha pioneira iniciativa do Concello de Carballo con ese programa Programa Primavera enDanza, que terá no venres e no sábado as súas primeiras citas. Tamén en Carballo, onde hai unha fin de semana de vertixe teremos a Inaguración da Galería Garabato, Ademais, o venres, toca nova sesión de Cine na Capela de Corcubión.
Ao longo do día do venres e do sábado, poderemos facer unha Visita ao Museo do Forno do Forte, aproveitando o Día Europeo da Artesanía, con demostracións en vivo.

O sábado arrincará coa I Andaina Costa da Morte por Camariñas. Un ciclo que segue os pasos de Traski e percorrerá 8 concellos da volta, comezando por unha sesión pola zona do Cabo Vilán.
Poderemos tamén, e unha pena que se solapen, achegarnos a botar unha man na Limpeza de plásticos do Museo de Man</a>, que propón a asociación Mar de Fábula.
Pola tarde, presentación dun libro de naufraxios en Carballo. E pola noite, ademais da cita ca danza, teremos unha sesión de monólogos en Muros, con Rober Bodegas e Champi. Teremos a 9ª Foliada de Cerqueda, e a orixinal Gran Festa de Primavera no Lestón, en Sardiñeiro, coa chegada dos Magnifique Bande dos Homes sen Medo.
E pecharemos a noite con 3 concertos, o do vimiancés Serj en Vimianzo, o de Anima e Aphonnic en Carballo e mais o de Fikipaldis tamén na capital bergantiñá.

O domingo comezarémolo coa primeiro sendeiro do programa Primavera en Ruta de Senda Nova, polas Mámoas de Cabana. E pecharémolo, como non, coa cita dominical vimiancesa. Desta volta, arrincando co Mes da República da Liberdade, NNC Teatro e a súa Santa Perpetua en Vimianzo.

Máis información

• www.axendacostadamorte.com.

Fonte

• Redacción de QPC (info@quepasanacosta.gal).