O Castro de Mallou xa vive


Nova demostración de como se fai arqueoloxía por e para o pobo. De como facer que o patrimonio volva ás mans da cidadanía, de como facer que sexan as persoas, e non as elites, as protagonistas da historia. A Torre dos Mouros revolucionaba a forma de facer arqueoloxía en Galicia e o Proxecto do Castro de Mallou é a súa primeira herdanza.
O multidisciplinar equipo de traballo xa está no alto de Mallou tratando de recuperar do estado de abandono no que estaba o Castro reanudando a campaña realizada no 2006-2007. Con Antón Malde como coordinador, moitos voluntarios de todas partes de España chegan para botar unha man e recuperar e seguir investigando os traballos realizados durante a campaña do 2006-2007. Arqueológos, xornalistas, mestres, debuxantes, escultores... un equipo de primeira invitado a través do Concello carnotán, que aloxa ao núcleo para afrontar a campaña.
Un Castro cheo de historia contado en tempo real
"Esta é a entrada ao espectacular castro de Mallou", como nos conta o xornalista de GC Xurxo Salgado en tempo real a través do Facebook "Proxecto Torre dos Mouros". Dende o outro lado da pantalla podemos seguir descubrindo a nosa historia, como vivían os nosos ancestros, e coller forzas para achegarnos por aló enriba a axudar.

E esto outro xa é o que se coñece do castro de Mallou. "Aquí escavou a empresa Antropos en 2007 dentro dunha campaña arqueolóxica impulsada pola Secretaria Xeral de Xuventude da Xunta. Entón sacaron á luz elementos monumentais como a porta que xa vos amosamos antes, ou un impresionante corpo de garda e posible alxibe".
Os primeiros vídeos
E gracias ao equipo de traballo xa imos tendo material audiovisual a través do Youtube do Castro de Mallou. Aí van as primeiras achegas:
Que se vai facer no Castro de Mallou?
Antón Malde, director arqueolóxico do proxecto de mallou explica o que se vai facer durante estes 15 días.
A Pedra do Porquiño. O primeiro ser mítico do castro de Mallou
Antonio Pablo ou Pablo Antonio, "O Cañón" para os veciños da parroquia de Mallou, explícanos a orixe da escultura do porquiño que é o ser mítico descuberto no castro de Mallou. Apareceu entre os muros da muralla e acabou no muro dunha casa particular. Alguén foi unha noite a roubalo, pero gracias ao escultor Marcos Escudero o porco pode que volte a Mallou.
Festa do Castro
O sábado 27 será un día intensísimo no castro de Mallou. Haberá visitas ilustres, moitísimo traballo de voluntarios e todo tipo de actividades, música... que xa podedes ver no programa.
Unha delas, será unha sesión de mitos e lendas para os máis pequenos, como fixeron o ano pasado na Torre dos Mouros.

Máis información
Máis novas
- O Castro de Mallou, o novo Proxecto dos Mouros.
- Carnota repetirá viaxe de Castros a Castelos tralo rotundo éxito das Xornadas.
- Fósiles no Monte Pindo?.
- A antoloxía poética do Monte Pindo trae xa os seus versos do Olimpo.
- Herdeiros pola Forza: O patrimonio volve ás mans da cidadanía.
- Primeira etapa da Torre dos Mouros, un proxecto do pobo.
- A #TorredosMouros cambia a forma de facer arqueoloxía.
- Especialistas internacionais introducirán a construción ecolóxica na Costa da Morte.
Fonte
- Redacción de QPC (info@quepasanacosta.gal).