Como cada venres, toca facer repaso das principais citas culturais e de ocio programadas para esta fin de semana na Costa da Morte. E como sempre, haberá algo de todo: teatro, monólogos, exposicións,... e algo de música. Ademais, segundo o parte costeiro de 4gotas.com a climatoloxía será máis agradable que na anterior fin de semana pero... A borrasca que atravesou onte Galicia deixando vento e choivas durante a tarde, comeza hoxe a descender paralela á costa galega en dirección a Lisboa. Nese movemento deixará aínda algún refacho de vento do sueste pola mañá e algún chaparrón, posiblemente con treboadas e/ou saraibadas na tarde de hoxe. O sábado e o domingo, a borrasca situarse entre Lisboa e o Algarve e desde alí impulsará vento do nordés que deixará un tempo moi distinto entre o norte da Costa da Morte e o sur. Entre Camariñas e Malpica zoará forte ese nordés e acumulará máis nubes. Na tarde do sábado e ata o domingo á mañá deixará chuvias febles. No mediodía do domingo abriranse claros e nos dous días deixará unha sensación de fresco. Entre Muros e Fisterra pola contra, predominará o sol e con máximas de 14-15 graos. No interior, canto máis preto de Bergantiños, máis nubes e máis vento. Teatro

• O pazo da Cultura de Carballo acolle hoxe a segunda cita do programa dos “Venres culturais”. O espectáculo, que nesta ocasión é musical, correrá a cargo de Caxade que presenta o seu terceiro traballo "E isto é o amor". O concerto comeza ás 21 horas e o custe da entrada é de 3€ e 2€ con desconto.
• Federico Pérez ofrece mañá un monólogo na casa da Cultura de Vimianzo. Esta é unha das actividades que se enmarcan dentro da programación cultural do concello vimiancés. O custe da entrada é de 3,5€ (1,75€ para estudantes e maiores de 65 anos).
• A compañía Sarabela Teatro trae este sábado a Muros a súa obra “Normas para saber vivir na sociedade actual”. A función comeza ás 21:30 horas no auditorio do centro Cultural de Muros.
• Teatro en familia en Carballo. Xa o domingo, Sarabela Teatro representa no pazo da Cultura carballés a obra "O secuestro da biblioteca". Un espectáculo para toda a familia que se enmarca dentro da programación dos "Venres culturais". Comeza ás 18 horas.

  Exposicións 

• O pazo da Cultura de Carballo acolle ata o vindeiro domingo 19 de febreiro a exposición “Un mar de sensacións”. Chiña e Mon Lendoiro recompilaron os poemas publicados polo Semescom no ano 2012 para darlles forma plástica. Hoxe, ás 20:30 horas terá lugar o acto de inauguración. A mostra pode verse todos os días en horario de 17 a 21 horas.
• A casa de Man de Camelle acolle unha exposición de pintura naval. Baixo o título “Costa da Morte. Naufragios” Rosa Pereda e Rafael Lema recuperan as historias dos naufraxios máis importantes acontecidos nas augas da bisbarra. A inauguración terá lugar mañá sábado ás 12 horas.
• Castelo de Vimianzo. A fortaleza así como a súa mostra de artesanía ao vivo pódese visitar todos os días da semana en horario de 10:30 a 14 horas e de 16 a 19 horas.
• As Torres do Allo, en Zas, abren todos os sábados e domingos de 11 a 19 horas. Ademais, o pazo acolle unha mostra de pezas de Olería de Buño e ofrece visitas guiadas gratuitas ás 13 e ás 17 horas.
• O faro Vilán acolle ata o 26 de febreiro a exposición “Casa de Luz, grabados” de Mariano Castillo. Pode visitarse en horaio de 11 a 14 e de 16 a 18:3o horas.
• No dolmen de Dombate ofrécense visitas guiadas todos os días de 10:30 a 14 e de 16 a 18:30 horas.

Outras citas

• Concerto en Fisterra.  A mítica banda Vavar actúa hoxe, a partir da media noite, no Boulevard de Fisterra. A entrada é de balde.
• Faladoiro en Ponteceso. O ornitólogo José Luis Rabuñal Patiño ofrece hoxe, ás 20 horas, un faladoiro na biblioteca municipal de Ponteceso.
• Curso en Laxe. O xefe de servizos do centro superior de Hostelería de Galicia, Ángel Benavente imparte hoxe ás 17 horas un curso de formación baixo o título "A excelencia na atenciónó cliente".
• Conferencia en Laxe. Dentro do "Febreiro gastronómico" o xornalista José Manuel Orriols imparte mañá, ás 19 horas, unha charla sobre a gastronomía tradicional de Laxe.

Fonte

• Redacción QPC ([email protected])