Tanto a saída como a meta da primeira etapa da Volta estarán situadas no campo da Feira, onde tamén se vai levar a cabo unha “ginkana” infantil para nenas e nenos de 7 a 12 anos. Dende primeira hora da mañá e ata que finalice a proba ciclista, esta zona permanecerá pechada ao tráfico para garantir o correcto desenvolvemento da proba e velar pola seguridade de todos os/as participantes no evento. Así mesmo, a avenida Eduardo Pondal e a rúa Vereda tamén se verán afectadas por cortes de tráfico puntuais tanto á hora da saída da carreira, prevista para as 14h, como a súa chegada, arredor das 17:30h. Ademais, nesta última vía quedará prohibido o estacionamento ao longo de todo o día e xa dende esta noite.

A Volta Ciclista partirá de Ponteceso realizando un percorrido de 20 minutos por varias localidades do termo municipal nas que tamén se producirán cortes de tráfico ocasionais para facilitar o paso dos ciclistas. Desde a concellería de Deportes, que preside Marco Varela, solicítase a colaboración cidadá, tanto de condutores/as como de veciños/as, para que a xornada transcorra con normalidade e sen incidentes, gozando dun evento deportivo de primeiro nivel.

Se tes previsto realizar algún desprazamento polo municipio durante a celebración da proba, toma boa nota do percorrido e os horarios da XVII Volta Ciclista á Provincia da Coruña no Concello de Ponteceso.