Completa xa case temos a fin de semana futboleira (só falta o arrinque da liga Cadete) co comezo da 3ª Autonómica. E o facemos nesta fin de semana de outubro pasada por auga. De feito, así nola describen os amigos de 4gotas: O tempo da fin de semana na Costa da Morte seguirá sendo otoñal. Podemos dividir a Costa en dúas partes. Unha de Muros a Muxía, onde haberá chuvias intermitentes, puntualmente intensas o venres e sábado a primeira hora, sendo moi febles e ocasionais o resto do sábado e o domingo ata a tardiña cando volverán as chuvias. O vento a partir do mediodía do domingo volverá a soplar con moita forza do sur-sudoeste. A outra ao norte de Muxía. Alí o venres non choverá ata chegar o solpor. Ademais canto máis preto de Malpica veremos máis sol. O sábado non choverá ata a noite que caerá algún chuvasco illado (tamén na madrugada do domingo). Despois o domingo á tardiña tamén chegarán chuvias intensas e tamén desde o mediodía do domingo soplará con moita forza o vento do sudoeste.
A Previa
E comezamos a previa pola Preferente que chega co derbi probablemente máis interesante da temporada. O Dumbría, con varios ex xogadores do XSC, recibe ao cadro xalleiro nun momento perfecto para medir forzas. Os de Julio Martínez sorprenderon cun arrinque espectacular de tempada trala estampida a final de pretempada, mentres que o renovado equipo de Canosa ten que aspirar a máis e esta pode ser unha boa pedra de toque para medir as posibilidades. Ademais, o Bergantiños buscará manter o liderato ante o Estudiantil e o Soneinra necesita sguir sumando ademais ante un dos que pode ser rival, o Mugardos.
Na 1ª Autonómica tamén temos derbi. Entre dous equipos que están que se saen, como son Malpica e Baio. A xornada é clave para o Ponteceso. O pechacancelas necesita puntuar e terá un fronte un rival directo como o Sigüeiro. Ademais, o Camariñas recibe ao Bertamiráns B e a Esteirana a Lamela.
A 8ª xornada da 2ª Autonómica trae dous focos de atención tremendamente interesantes. En San Pedro, o Castriz de Corredoira recibe ao Sofán de Pablo Mallón, choque de trens. Ademais, no San Paio de Refoxos Cee e Corme medirán forzas, cun Cee ben posicionado e un Corme que non pode seguir fallando se quere estar arriba.
E tralo partido adiantado do pasado domingo, arrinca ao completo a 3ª Autonómica. Un Liga curta, e de feito esta semana só teremos 5 partidos, e que comeza con moitas incógnitas. O Sp. Seaia debuta ante un dos favoritos, o reforzado Baíñas. Un dos encontros que a priori parece interesante será o Cerqueda-Ameixenda.
En Xuvenís, xornada matutina no Gr.3, cun partido máis que interesante. O Dumbría terá unha proba de forza ante un Fisterra que está a só 1 punto. Ademais, ca Esteirana e o Outes descansando, o XSC e o Cee intentarán aproveitar calquera tropezo para achegarse arriba. No Gr.4 o choque máis interesante será o Baio-Malpica, sendo case que a última oportunidade para o cadro baiés de meterse na loita.
Fermosa ocasión para achegarse ao Conco na tarde do sábado para disfrutar da gran División de Honra Cadete. O Dumbría, 4º, recibe a todo un Deportivo, 2º, no partido máis esperado do ano. Tamén chega o Deportivo ao Conco na Liga Galega Infantil para enfrontarse ao equipo dumbriés.
Ademais, teremos en liza os Cuartos da I Copa da Costa Cadete, coon bos partidos, unha semana antes de comezar a Liga e deixar as semis para o 2014.
Na Liga Infantil, Cee e Corme buscarán continuar coa súa imbatibilidade ante Coristanco (4º) e Cabana (7º), respectivamente.
E para rematar, na Liga Intermunicipios teremos un dos choques do ano, entre dous dos favoritos que ademais levan 3 vitorias en 3 partidos. O Sp. Brea e o Cereo medirán as súas forzas.
