Preferente: Comeza a liga da igualdade

14:24 29/08/11

Comezou a liga de Preferente, este curso con "tan só" 20 equipos, e con 4 representantes da nosa bisbarra. O ascenso dos Xallas e Dumbría, e o descenso do Santa Comba, fan que por primeira vez nos últimos tempos a Costa da Morte conte con 4 equipos nesta potente categoría, polo que este curso manteremos unha atención especial dende a redacción de deportes de QPC. A primeira xornada deparou diferente sorte para os nosos. Mentres o Xallas deu a primeira alegría aos siareiros verdes, o Dumbría non podía sumar en Dubra. Sendos empates colleitaron Soneira e Santa Comba, dando conta da igualdade da competición.

O Val - Xallas (0-1)

Xallas: Cheli, Ismael, Iván Forján, Becerra (Brais, min.62), Rubio, Martín, Luís (Alexandre, min.46), Álvaro, Adrián Beiroa (Adrián Prol, min.74), Toni e Iván Amor (Aitor, min.59).
Gol: 0-1, min.8: Toni tras unha contra perfecta, a centro de Adrián Beiroa.
Expulsión: Iván Forján no min.38 por doble cartón, e a un visitante no min.80.

Primeira vitoria do Xallas en Preferente 24 anos despois. Así comeza o curso o cadro de Iván Cancela, tras unha pretemporada na que a rotura parcial do ligamento cruzado de Jesús foi a nota máis negativa. O que queda claro é que este ano "vai ser todo moi igualado", como comenta o propio Cancela. E comezou ben o curso o equipo xalleiro que soubo controlar ao comezo, marcar nunha contra perfecta, e logo sufrir e aproveitarse dunha pequena dose de sorte. E sufriu abondo pois dende o min.38 quedaron con 10 homes tras unha discuible expulsión de Iván Forján por unha faltiña e unha pequena protesta. Ata aí o Xallas controlaba o balón e tiña máis presencia no campo, pero a partir de aí as incursións dos laterais locais provocaban situacións e superioridade nas que a defensa xalleira tivo que empregarse a fondo.

Gal. Mugardos - Soneira (2-2)

Soneira: Fran, Ferreiro, Modesto, Vecino, Pablo, Santi, Víctor García, Míchel (Iago, min.65), Kike (Fran de Urroa, min.65), Jorge Vigo (Mauro, min.77) e Vía Rápida.
Goles: 1-0, min.47; 2-0, min.73; 2-1, min.85: Vía Rápida de falta; 2-2, min.89: Vía Rápida de penalti.

Primeiro empate e primeiro punto do Soneira fóra da casa. E nun encontro complicado, no que a carencia de ocasións de gol e a igualdade foron as protagonistas. Empezaron moi ben os vimianceses, combinando con criterio. Pero a partir da media hora os locais impuxeron o seu forte ritmo, iso si, sen chegar a intimidar a Fran. Á volta do descanso marcaron os locais moi pronto, e o encontro seguía moi centrado no medio campo. Todo parecía que quedaría con ese 1-0 ata que os locais marcaron o golazo da tarde. Foi aí cando reaccionou o Soneira e a golpe de coraxe, e de xogadas de estratexia, deron a volta ao marcador. Vía Rápida recurtaba, a falta de 5 minutos, de falta, e asinaba o empate case que co tempo cumplido dende os 11 metros. Empate xusto, con momentos para os dous equipos e poucas ocasións.

Santa Comba - Narón (1-1)

Santa Comba: Diego, Amoedo, Noli (David Blanco, min.50), Ángelo, Toni, Gonzalo, Doro, Jota, Óscar (Colón, min.55), Julián (Chinda, min.89) e Pablo Baña (Iván Facal, min.75).
Gol: 0-1, min.60: de penalti. 1-1, min.89: en propia meta.
Expulsións: os locais Toni (min.60) e Doro (min.65).

Primeiro e traballado empate dos de Santa Comba na Preferente. Tras unha primeira metade igualada e sen oportunidades, o minuto 60 foi clave para o desenvolvemento do encontro. Tras un lixeiro dominio local, un penalti "tonto" cometido por Toni deu con el nos vestiarios, e co 0-1 no marcador. A mala sorte fixo mella nos locais e na seguinte xogada o colexiado expulsaba a Doro tamén por doble cartón. E foi con 9 homes cando os xalleiros apretaron máis. Jota dende atrás colgaba e colgaba balóns sobre a área ferrolá, que tamén sacaban perigosas contras. De feito, Diego salvou dous man a man que puideron sentenciar o choque. Tras varias intentonas, e cando xa case se cumplían os 90 regulamentarios, un erro de coordinación entre meta e defensa naronesa, provocaba un gol en propia meta que deixaba as táboas no marcador.

Dubra - Dumbría (1-0)

Dumbría: Juan, Iván Pequeño, Suso, Chula (Toni, min.90), Ismael (Tantán, min.50), Aarón de Muros, Schuster (Tati, min.65), Piri, Iago (Riqui, min.85), Cacho (Luisito, min.65) e Adrián.
Gol: 1-0, min.89.

Con cara de tontos quedaron os dumbrieses tras ter ocasións suficientes para levar, cando menos, un empate. Foi un partido moi igualado, no que os de Canosa deron a cara, buscando moito máis a combinación que os locais, cun xogo moi directo. E iso que chegaban máis rodados, pois a pretemporada, entre lesións e festas, foi bastante convulsa no cadro dumbriés. Tivo o cadro costeiro varias ocasións na primeira metade para porse por diante, como un penalti fallado por Adrián, un balón ao pao de Piri tras unha falta. Na segunda o propio Piri tivo un man a man que salvou o meta local. E cando todo sinalaba un empate, un erro defensivo tras unha melé na área dumbriesa rematou no gol da vitoria. Mal resultado pero boa imaxe dos dumbrieses neste comezo de campaña.