Nova xornada de fútbol da Costa xa coa noite case que como protagonista. Nunha fin de semana ademais onde o fútbol da Costa volveu demostrar o seu apoio ao xogador do Pereiriña Gabri, que segue recuperándose no hospital. As ducias de felicitacións que lle están a achegar dende todos os puntos da bisbarra dan conta da unión do fútbol costeiro nestas vicisitudes.
Xa no eido deportivo, comezamos o repaso pola Preferente onde só sumou o que máis o necesitaba. O Soneira podía cun Boiro na zona alta, facendo ademais un favor ao Santa Comba, que non pasou do empate ante o Val, no que era a priori un encontro fácil para os laranxas. Dumbría e Xallas caeron e xa demostraron un lixeiro baixón tras un fantástico comezo de campaña.
Na 1ª, boas novas para o Ponteceso, que sae do Pozo, pero non para o Cee, que segue sufrindo carencia de remate e volveu perder ante o Cariño, un rival directo.
Resultados novedosos na Liga da Costa. Se ben o Camariñas non perdoou en Zas, o Club do Mar non foi quen de sacara nada positivo de Ara Solis, ante un Fisterra que mellora e mellora. Ponse de segundo xa o Muros, tras vencer ao Baio sen facer demasiado pero si con solvencia como nas últimas semanas. O Dumbría B perde fol e caía ante un Sofán que tamén vai cara arriba. Por abaixo, importantísima vitoria do Corcubión en Mazaricos para non afundirse definitivamente, e nova derrota do Pindo, desta volta ante un da súa liga, o San Lorenzo. Sorprendeu tamén a vitoria do Buño no derbi co Malpica.
A xornada na 3ª chegaba cun encontro clave, no que o Montelouro desfíxose don Outes con relativa facilidade e lle saca do liderato. É agora o Coristanco, que non perdoaba ante o Alcaián, o líder por diante de muradáns e da Serra. Pero o Cabana vén pegado, ao igual que o Carnota.