• Última hora: Por mor do mal tempo, o Rastriño queda aprazado para o sábado 9 de maio.

Chega o I Rastriño Internacional na Fin do Camiño. Esta ponte do 1 e 2 de maio a vila de Fisterra acollerá esta fermosa cita ca Cultura na rúa e a artesanía, promovida por un dos grandes dinamizadores da vila do Cristo como é Roberto Traba Velay, que mentres nos trae a súa novela por capítulos en QPC, trata de armar, coa colaboración do Concello, un completo programa de actividades e artistas para encher a rúa, o mellor escenario posible.

A rúa Real será escenario e testemuña de artistas locais e de diferentes países. Abrirá a festa o o venres co pregón de Mighel, coñecido artista fisterrán que de seguro fala da arte natura fisterrá. Peter Punk encherá a tarde para os cativos, o veciño Xermán Martínez fará un monólogo pola tarde, e o propio Roberto fará o conxuro antes de que caia a noite.

O sábado 2 de maio comezará con talleres e xogos populares na praza da Constitución. O Grupo Alas de Circo animará a feira, e tamen estarán os de Pistacatro facendo teatro de rúa. Tini Rivas será protagonista entrada a tarde, dando paso á nova Queimaxa e ao espectáculo nocturno de Alas de Circo, que servirá para pechar o Rastriño.

Preparen as súas mellores galas, pois estarán gravando un vídeo promocional para vindeiras edicións, e tanto os artesáns como os veciños terán que demostrar que Fisterra é unha vila festexeira.

Novas relacionadas

• Fisterra prepara unha gran festa na rúa co I Rastriño Internacional da Fin do Camiño.
• A novela de Roberto Traba Velay: Liberdade ou morte! Aventuras dun valente fisterrán e unha estanqueira corcubionesa.
• 2011: “Feito a man” descobre as marabillas artesás da zona no Faro da Fin do Mundo:
• Mostra de Artesanía de Fisterra 2009: Máis de 4.000 persoas visitaron a IV Mostra de Artesanía de Fisterra.

Fonte

• Redacción de QPC (info@quepasanacosta.gal).