Nunha escola unitaria de Vilar de Duio chea de público, Guadalupe Vázquez Formoso presentou este domingo 29 a súa novela xuvenil “Alicia no Labirinto das Sombras” (Belagua Ediciones), que trata sobre o acoso escolar, o tristemente célebre “bullying”.

No evento, organizado pola comisión de festas Duio-Fisterra e o Concello de Fisterra e amenizado pola charanga “A Tripulasión”, abordouse e reflexionouse de maneira colectiva sobre o tema que a autora trata na obra: o do acoso escolar.

Durante o acto, Vázquez Formoso compartiu fragmentos da súa obra e destacou que a novela nace da súa preocupación como educadora sobre esta problemática que afecta a demasiados nenos e mozos na actualidade e que pode deixar unha fonda pegada para toda a vida, “polo cal é tan importante abrir espazos de debate e reflexión para poder poñerlle remedio”.

A alcaldesa de Fisterra, Áurea Domínguez, e Eva Senlle, presidenta da comisión de festas Duio-Fisterra, acompañaron á autora nesta presentación dunha “ferramenta valiosa para dar visibilidade e sensibilizar sobre este tema: Alicia no Labirinto das Sombras”.