Modesto Fraga denuncia que o Concello fisterrán é o máis endebedado da Costa da Morte

09:05 21/02/11

A tres meses vista das eleccións municipais do vindeiro mes de maio, hoxe coñecemos un pequeno resumo da nova candidatura de Modesto Fraga no BNG do Concello de Fisterra. Unha candidatura novedosa, en tanto que non é o máis normal ver un senlleiro persoeiro do eido cultural metido de cheo na vida política. Modesto facía balance dende o seu Facebook da situación política do concello, que considera "inmerso nunha apatía e nun desconcerto" e que precisa xa unha "resposta do (des)goberno municipal".

Débeda

Xa son 12 anos de gobernos do PP, anos que para o BNG implicaron que "o noso municipio ficou atrás, perdido á intemperie, sen ningún tipo de ambición nin de perpectivas de futuro". A isto hai que engadirlle que "o concello de Fisterra ostenta o "grande mérito" de ser o municipio máis endebedado da Costa da Morte, cun 32,5% do seu presuposto hipotecado, case ao límite do permitido pola lei".

Carencias

E iso que "os fisterráns aínda non contamos con servizos tan básicos e primarios como un Centro de Saúde minimamente decente, unha Casa de Cultura (Dumbría, sen ir máis lonxe, conta con sete, unha en cada parroquia), unha oficina de turismo, unha gardería infantil, un PXOM co que podermos organizar o noso territorio, unha programación cultural á altura da historia e do prestixio da universalidade de Fisterra, unha biblioteca pública en condicións, etc, etc."

Propaganda

Denuncia o propio Modesto como, a vista das eleccións, o goberno anuncia agora, "a bombo e platillo, que todas estas carencias serán debidamente atendidas a partir da próxima lexislatura". Con todo, e "a raíz da "Operación Orquestra" os alucinatorios plans dos iluminados peperos van camiño de ficar en papel mollado", vaticina.