O Concello de Fisterra pon as mans á obra co saneamento de Sardiñeiro, a Anchoa e o porto

Fisterra

23:03 02/07/15

Era unha petición máis que demandada na vila do Cristo, despois de todas as problemáticas xeradas a nivel urbanístico no concello fisterrán. O grupo municipal, aproveita a colocación da Bandeira Azul na Praia Langosteira ara anunciar que en xullo comezarán as obras que eliminen os vertidos na praia de Sardiñeiro, e que será modificado o sistema de bombeo no porto-

Serán medidas para o control da calidade das praias e das augas portuarias, despois de xuntarse con técnicos de Augas de Galicia para abordar os múltiples problemas de saneamento detectados en puntos coma a praia de Sardiñeiro, na zona da Anchoa e San Roque, e no Porto.

Dende o Concello queren unha solución definitiva que corrixa os múltiples vertidos fecais existentes e que afectan de maneira diferente:

Por unha banda á praia de Sardiñeiro clasificada pola Consellería de Sanidade coma de Calidade Insuficiente.
Os vertidos en distintos puntos do Porto por desbordamento dos colectores.
Tamén se valora moi importante solucionar os vertidos fecais que chegan á zona da Anchoa e San Roque e nas Pardas que permita dar comezo a un plan de rexeneración do banco de coquina.

Así, o concello vén de dar orden ao seu persoal de obras para activar un protocolo de seguimento e vixianza sobre posibles puntos de vertidos fecais e deficiencias na rede de colectores. Foron detectados 4 problemas importantes na rede de bombeo no treito da Anchoa e na zona Portuaria e do que se demandará a Augas de Galicia que aprobe un plan inmediato que corrixa as deficiencias e poder contar así cun sistema solvente de depuración das augas.

Praia de Sardiñeiro

Unha das principais preocupacións é reverter a situación da praia de Sardiñeiro. En dúas semanas comezaran as obras de arranxo de separación de augas pluviais e fecais, co cal quedarán solucionados os vertidos sucesivos sobre a praia, e poderase iniciar a súa recuperación para un uso público con tódalas garantías. Nestes momentos a Consellería de Sanidade mantén a clasificación desta praia coma de calidade insuficiente, en base aos resultados dos controis das últimas catro temporadas. A pesar que as mostras obtidas os pasados 8 e 22 de xuño, por Sanidade, ofrecen uns valores mellorados en canto a presenza de bacterias fecais a praia mantense con dita clasificación de insuficiente. Con estes últimos resultados parciais a praia xa sería apta para o uso normal de baño.

Pedirán ademais a Costas “a urxente intervención de melloras sobre todo o paseo, pedíndolle que aprobe un proxecto polo que se restitúa todo o mobiliario de madeira: pasarelas, pontes, baños, bancos. Así coma todo o sistema de iluminación e a area de xogo pra cativos”. Tamén figura a “preocupación da situación ambiental da duna da praia, que sendo unha moi boa representación dunar precisa dunha intervención de restauración ecolóxica pola que se eliminen tódalas especies de plantas invasoras”, e se delimiten os accesos para evitar procesos erosivos e de deterioro. Para a erradicación da flora exótica invasora o Concello quere pedir autorización a Costas para realizar unha actividade de voluntariado ambiental.