O temporal destapa a doce historia dos naufraxios no Rostro

10:40 10/03/14

Os efectos dos naufraxios déixanse notar na praia do Rostro como en poucas outras praias do mundo. Cando vai algo de mar de fondo as galletas de chapapote do Prestige fan a súa reaparición. E tamén aparecen mareas e mareas de trozos de metal, que xa teñen tantos anos como leva o Casón afundido diante da praia. Pero o que deixaba á luz o temporal esta fin de semana só o esperaban os especialistas mergulladores. O casco enferruxado do vapor portugués "Silva Gouveia", que naufragaba aló por 1927 cando un temporal o cazaba pasando polo fin da terra cargado de zucre, saía ca baixamar a flote para o deleite dos espectadores. Un naufraxio sen mortes. Como recolle o bo de Luís Lamela na Revista Alborada, de marzo de 1928: "El vapor portugués 'Silva Goveia', que había embarrancado en el lugar de Castreje, fue destrozado por los temporales de los últimos días, salvándose solamente alguna carga y poco más de 300 toneladas de azúcar, de las novecientas y pico que traía. Para recoger dicha carga salvada, llegó a Corcubión otro vaporcito de la misma compañía que está cargándola, a medida que se traen en camiones desde Sardiñeiro". Unha nova que saíu en todos os medios a nivel estatal, o que deixa ver claramente a importancia que pode chegar a ter un bo programa do "turismo de naufraxios". A espectación da Gabarra Prima, aínda en espera de auxilio, pode ser un bo exemplo.