Mal comezo dos Mercados Mariñeiros que promoven os GACs ao longo do país. Facíano esta fin de semana en Fisterra, enlamados nunha longa semana por un grave erro ortográfico. I é que a campaña (con páxina web, de Facebook, carteis pegados por todo o país) tiña un lema erróneo, traducido literalmente do castelán sen decatarse que en galego, comer non é pronominal.

Así o erróneo "Cómete o mar" co que comezaba o mercado remataba nun correcto "Come o mar", xa coa web corrixida (aínda non a páxina de FB) pero co erro ás costas.

Pode ser este un erro de vulto, e máis se a proposta que prometen non é a máis axeitada. En teoría estes mercados serven para dinamizar o sector turístico de zonas costeiras e promocionar os produtos locais, neste caso os procedentes do mar.

Ata aquí todo correcto, de non ser porque dos 18 postos que ocuparon a zona da Ribeira, boa parte eran os típicos do Mercado Medieval de Corcubión, tanto a nivel gastronómico como artesanal. Que se pizzería, que se "jamón asado", que se kebab, que se alpargatas árabes... U-los produtos do mar da Costa da Morte? E os artesáns da zona?

Vindeiro mercado en Camariñas

A seguinte actividade do proxecto, será os 14, 15 e 16 de xuño no Mercado e no paseo marítimo de Camariñas. E se cadra xa quedan os postos ata Mercado Medieval de Camariñas que terá lugar en xullo...

Novas relacionadas

• O turismo mariñeiro esténdese por toda Galicia con Margalaica.
• 2,5 millóns de euros a través do Plan Leader entraron na Costa dende o 2007.

Fonte

• Redacción de QPC ([email protected]).