A Esteirana logrou comezar este 2019 cunha importante vitoria ante un Tordoia dirixido polo oleiro Dani Calvete nun partido no que os de Geno foron mellores ao rival. Pola súa banda, un Baio lastrado polas baixas e un necesitado Soneira tamén lograron sendos triunfos ante Praíña e Bastavales. Mentres tanto, o Fisterra continúa como líder logo de empatar co Piloño nun encontro pouco vistoso e marcado por unha arbitraxe que non gustou; e o Dumbría foi o único equipo costeiro que non logrou sumar logo de que o Esclavitud remontase o tanto inicial dos homes de Julián Ferreiro.

Esclavitud SD 2 – 1 CF Dumbría

Banco do conxunto local no Esclavitud - Dumbría. Foto: Facebook Sociedad Deportiva Esclavitud

• CF Dumbría: Iván Baña, Canario, David Carreira (Xacobe m.74), Marcos Mouro, Iago (Charly m.82), Rivi, Cespón, Darío (Marcote m.60), Yuyo, Eloy e Alberto.
• Goles: 0-1 m.22: Hugo en propia porta; 1-1 m.62: Merluzo (p); 2-1 m.73: Hugo.

Pintaba moi ben a cousa para o Dumbría ata o descanso, a pesares de que sería o Esclavitud quen gozaría da primeira ocasión clara do partido para adiantarse. Os dumbrieses foron quenes de controlar o encontro ata que se poñerían por diante no marcador nunha xogada desafortunada para os locais, xa que sería Hugo quen introducise o balón na súa propia portería. Tralo tempo de lecer, invertíronse os papeis e foi o Esclavitud quen se fixo co mando do partido e mediada esta segunda parte, un desafortunado penalti por mans de Canario, aproveitaríao Merluzo para devolver as táboas ao marcador e darlle folgos a un conxunto local que se veu arriba e que lograría darlle a volta ao marcador cun gol dun Hugo que se resarciría da acción da primeira metade, dándolle a vitoria aos seus.

CD Baio 3 – 1 Praíña SC

Baio-Praíña

• CD Baio: Dani Varela, Norberto, Yago, Guau, Rubio (Álex Varela m.66), Peke, Moreno (Sergio m.73), Bieito, Santi Díaz, Iván Rojo e Martín MC.
• Goles: 1-0 m.12: Iván Rojo; 1-1 m.41: Javi Sánchez; 2-1 m.47: Moreno; 3-1 m.90: Bieito.

O Baio saltou ao terreo de xogo moi enchufado e grazas a iso, os de Pablo Torreira foron quenes de dominar o encontro durante os primeiros vinte minutos, intervalo de tempo no que os branquiazuis se poñerían por diante cun cabezazo de Iván Rojo. En lugar de que este gol lle dese tranquilidade aos baieses, estes comezarían a ter numerosas perdas de balón e nunha delas, a falta de catro minutos para o descanso, o Praíña lograría devolver as táboas ao marcador. Nada máis reanudarse o partido, Moreno materializaba un libre directo para poñer aos seus de novo por diante no marcador. Tras isto, o Baio volvería a ter uns minutos de dominio pero sen crear ocasións de perigo. Co paso dos minutos, o Praíña comezou a intentalo a base de centros á área e nun barullo na área, o colexiado sinalaría unha pena máxima que non lograrían materializar os de Teo. Xa co partido tocando ao seu fin, Bieito faría un auténtico golazo para poñer o definitivo 3-1 e pechar unha importantísima vitoria para un Baio que contaba con moitas baixas para este encontro.

SD Esteirana 2 – 0 SD Tordoia

Plantel da SD Esteirana

• SD Esteirana: MJ, Simón, Samuel, Maroñas, Álex Rama (Pachi m.87), Elías (David m.83), Róber Pladur, Josiño Barreiro (Eloy m.89), Codesido e Dani Rama.
• Goles: 1-0 m.68: Álex Rama; 2-0 m.82: Róber Pladur.

A Esteirana volve á senda da vitoria logo de catro xornadas e faino despois de facer un gran partido a nivel defensivo no apenas tivo erros nesa parcela e no que se mostrou superior ao Tordoia. Os homes de Geno lograron crear varias oportunidades para adiantarse no marcador pero non sería ata o minuto 68, cando Álex Rama faría o 1-0. Xa co partido tocando ao seu fin, Róber Pladur volvería a citarse co gol por segunda xornada consecutiva para poñer o 2-0 no marcador e darlle tres puntos importantísimos a un Esteirana que foi mellor que o rival no cómputo global do encontro.

UD Bastavales 0 – 3 Soneira SD

Bastavales-Soneira

• Soneira SD: Javi Souto, Aarón, Alemán (Brais m.82), Agra (Samuel m.60), Pose (Chinda m.75), De La Sierra, Sandelo, Madiop, Álex Taibo, Basti (Luis m.66) e Pichi.
• Goles: 0-1 m.24: Aarón; 0-2 m.26: Pichi; 0-3 m.50: Basti.

O Bastavales saltaba mellor ao terreo de xogo e incluso puido adiantarse no marcador pero unha vez que o Soneira se sacudiu a presión, os de Pedro Gómez lograrían dominar o encontro con comodidade e xa Pichi avisaría cun remate que se foi fóra por pouco. En tan só dous minutos, os vimianceses lograrían dous goles que poñían o partido moi de cara para os seus intereses. O primeiro chegaría logo dun rexeite do porteiro a un penalti lanzado por Aarón, que resolvería este en segunda instancia, mentres que o 0-2 chegaba dende os once metros logo de que Pichi transformase unha nova pena máxima. Antes do tempo de lecer, o Bastavales tivo unha boa oportunidade para recurtar distancias pero o longueiro evitaría o gol. Na reanudación, o Soneira foi o claro dominador e Basti pecharía unha goleada que puido ser maior se o árbitro chega a pitar dous penaltis que solicitaron os vimianceses sobre Aarón e Madiop.

SD Fisterra 1 – 1 SD Piloño

Fisterra-Piloño

• SD Fisterra: Iván Bouzón, Julio, Rubia, Breixo, Andrés, Aarón, Piti, Jesús (Dani m.60), Bruno (Edu m.75), Roa (Pablo Lestón m.60) e Makaay.
• Goles: 1-0 m.60: Julio á saída dun córner; 1-1 m.85: Manu García.
• Expulsión: Makaay no minuto 55 por dobre amonestación.

O encontro estivo marcado por unha arbitraxe que non gustou nin a uns nin a outros, e polo fútbol directo do que abusaron ambos equipos e o cal fixo que o partido fose pouco vistoso. A tónica do xogo con moitos balóns en longo, veulle mellor a un Piloño que defendeu moi ben, ca a un Fisterra que lle gusta máis outro tipo de fútbol, moito máis vistoso. A pesares disto e a quedarse con dez homes pola expulsión de Makaay por protestar, os da fin da terra lograría adiantarse por medio de Julio á saída dun córner. A raíz dese momento, o Piloño insistiría con balóns colgados á área fisterrá e xa co partido tocando ao seu fin, encontrarían o premio do gol para levarse un punto do Ara Solis.