Días de olería e arqueoloxía polas parroquias de Malpica

10:21 27/03/15

Visita institucional para inaugurar o Forno da Costa

Xa estaba listo para unha cocedura dende o pasado setembro, pero faltaba a visita institucional a Buño en tempos de campaña para proceder á inauguración oficial. Deste xeito o Ecomuseo do Forno do Forte e o Forno dos Mourons xa teñen o seu curmán ben recuperado, para proceder xuntos a boas coceduras.

Os oleiros que levantaron o ano pasado a Mostra de Olería de Buño, seguro que están contentos pola aposta por recuperar o patrimonio. Ademais, segundo incidiron os representantes municipais e provinciais, teñen un programa de Turismo Escolar para que os máis pequenos da provincia recorran a súa historia.

Un oleiro explicando aos politicos como funciona o Forno da Costa

Xornada de Voluntariado na Croa do Castro

E esta fin de semana terá lugar a primeira xornada de voluntariado na Recuperación veciñal da Croa do Castro de Cerqueda. O proxecto, pioneiro en materia de Arqueoloxía Social, pretende recuperar historia da arqueoloxía oleira malpicá, e para iso, un completo equipo de arqueólogos, divulgadores e voluntarios, achegaranse á zona para proceder á primeira excavación.

Non é outro que o divulgador cultural Manuel Gago o que dirixe esta iniciativa, xunto cos veciños de Cerqueda. Un Gago destaca as sopresas que depara aínda a Croa do Castro e toda a parroquia de Cerqueda, como o conta nunha entrevista realizada no blog do proxecto.

No proxecto, no que colabora o concello, traballa un equipo multidisciplinar de tres arqueólogos, dirixidos por Fiodora López Patiño e coordinados por Manuel Gago, xornalistas e especialistas en turismo que pretende, coa axuda veciñal e voluntarios, reactivar culturalmente este espazo. Boa parte do castro é de titularidade municipal o que facilita as labores de posta en valor. A primeira acción que se vai levar a cabo vai ser a limpeza do castro, paso imprescindible para coñecer que tipo de estruturas hai, saber como actuar nelas e levantar un plano o máis preciso posible do sitio arqueolóxico. "O que descubriremos é o propio castro, xa que a limpeza fará que sexa máis visible na paisaxe e máis comprensible para a xente que queira vir a visitalo. Descubriremos tamén o seu gran parapeto e a planta interior, e quen sabe…", apunta Fiodora López. A limpeza vai ser levada a cabo por persoal especializado pero haberá pequenas zonas de singular interese para que veciños e voluntarios poidan participar no desbroce último do castro e das súas estruturas máis sensibles. Para iso, haberá dúas xornadas abertas á participación cidadá, unha este sábado, 28 de marzo, e outra o 11 de abril. Serán xornadas lúdicas, festivas e de contacto coa cultura científica. O traballo consiste, principalmente, na limpeza da croa do castro. O horario non será moi esgotador. Este sábado comezarase ás 10.00 da mañá e remataremos ás 13.30. A esa hora, os veciños e asociacións de Cerqueda serán agasallados cun “pasacroas”, a versión castrexa do pasarúas. Logo, ás 15.00 horas están previstos varios percorridos turísticos para que os veciños de Malpica, Buño e outros puntos da Costa da Morte poidan coñecer os sitios máis fermosos desta aldea.

O programa da xornada será a seguinte:

10.00 h. Benvida ao voluntariado.
12.00 h. Parada ciclista a cargo da Agrupación Ciclista Castro da Croa.
12:30 h. Visita guiada ao castro para voluntariado, asociados, veciñanza e visitantes.
13.00 h. Pasacroa e tocada de música tradicional a cargo da A.C. Raigañas.
13:30 h. Xantar campestre.
15.00 h. Rutas (continuadas) en tren guiadas por Xabier Couto Castro. Saídas Malpica (bar Panchito).
15.30 h. Rutas (continuadas) en tren guiadas por Xabier Couto Castro. Saídas Buño (O Empalme).
16.00 h. Ruta e parada cabalar a cargo da Asociación Cabalar Os Veteranos.
17.15 h. Ruta en tren para alumnado das actividades da A.C. Raigañas. Saída As Pozacas (local sociocultural).
17:30 h. Merenda para voluntariado e finalización da xornada de limpeza.