Nieves Villar, a nova nai coraxe da Costa da Morte-Foto-Ana Doldán

De sorpresa pódese calificar a ausencia do Conselleiro de Cultura, Educación e Ordenación Universitaria, Román Rodríguez González, na reunión que el mesmo fixara onte coa Confederación de ANPAS Galegas e Nieves Villar, a nai do neno malpicán enfermo de leucemia que necesita unha atención educativa domiciliaria. Moito máis sinxelo, nun caso tan mediático coma este, tería sido acodir á cita, mesmo sacar unha foto e zanxar o asunto cun "estamos traballando nelo".

Pero efectivamente Román non apareceu e "con cara de pasmo" quedaron os representantes da ANPA, como nos conta o propio voceiro Fernando Lacaci, cando se decataron que non ía estar. "Nós pedimos unha reunión co Conselleiro. Pero que nos dean como excusa a complicada axenda do Conselleiro, cando é o propio Conselleiro quen nos chama…" comenta Lacaci. "Os nosos representantes políticos son uns maleducados, e deixarnos a nós na porta poderíase entender, pero non recibir á nai dun neno con leucemia é un problema de insensibilidade rotundo", critica.

Lacaci considera que a Consellería pode non estar sendo consciente da potencia do caso. "Están topando cunha forza especial que é Nieves, que ve que é o problema a modo global. Dicíalles aos técnicos: "Eu aquí non veño polas horas do meu fillo se non polas horas de todos os fillos enfermos ou que poden estalo", o que dá conta da súa visión.

Porque non podemos esquecer que "os nenos e nenas inmersos nun proceso de longa enfermidade, apartados da vida cotiá, non só dos centros educativos, nos que a vida medra separada deles, deben ter unha atención especial. Pois ademais do dramatismo actual, hai que prever no seu futuro. Temos que pensar que todos van curar, e por iso temos prepararlles un futuro, para cando rematen unha experiencia xa de por si tráxica. O neno non ten por que adxudicarlle o valor de fracasado escolarmente. A administración ten que solucionar a vida futura deses nenos, o seu dereito de educación coma o resto, aínda que estean enfermos. Ademais, son problemáticas que hai que solucionar en canto xurden, porque estamos falando de cousas moi graves", apúntanos Lacaci, que remata a conversa cun claro "é incrible que no 2015, teña que erguerse nunha batalla mediática para esixir unha atención educativa dun neno enfermo".

Rolda de prensa de protesta

Rolda de prensa das ANPAS Galegas con Nieves Villar

Convocaba pois a Confederación de ANPAS Galegas unha rolda de prensa un día despois do desplante. Ademais de reiterar toda a necesidade dunha decente atención educativa domiciliaria, a rolda tiña como finalidade específica "denunciar que temos un concelleiro que nin tan sequera asiste a eventos que el mesmo fixa". Ademais, esixen unha nova reunión (presentarán mañá por rexistro a petición) coa persoa Román Rodríguez.

En todo caso, teremos a ocasión de escoitar en directo a Hadrián e a Nieves este venres ás 11:00h na TVE, despois de seren invitados esta mesma tarde.

Novas relacionadas

• O Conselleiro deixa plantada a nai do malpicán Hadrián.
• As Anpas Galegas inician unha campaña de reivindicación por unha correcta atención educativa para os alumnos enfermos.
• Hadrián, punta de lanza para unha campaña galega pola atención hospitalaria e domiciliaria
• A federación de Anpas da Costa da Morte reúnese coa nai de Hadrián
• Por unha atención educativa domiciliaria decente para Hadrián

Fonte

• Redacción QPC ([email protected])
• Confederación de Anpas Galegas