No pasado mes de xuño apareceu con pintadas a casa do Pescador de Malpica A grave situación que atravesa a confraría de Malpica chegou onte ao Parlamento galego da man da portavoz de Pesca do Grupo Socialista - Loli Toja - que reclamou onte unha “actuación rápida e contundente” da Xunta para “salvar á Confraría de Malpica”. Así o dixo no debate dunha pregunta oral en comisión parlamentaria sobre a situación do pósito, que acumula unha débeda de 300.000 euros con Portos de Galicia e coa Seguridade Social que pon en risco a súa supervivencia. Toja sinala que a prioridade do goberno galego “debe ser evitar que peche” unha confraría que conta con máis de 60 anos de historia e aglutina a máis de 200 cofrades, cun papel fundamental para a vila. Critica o desleixo do goberno galego fronte a esta situación, e sinalou que “sendo Portos un dos acredores máis importantes, deberan sentarse a falar e buscar solucións”. A responsable socialista sinala que a a débeda “aplasta a xestión diaria”, cos traballadores sen cobrar dende o mes de marzo e cun ERE a piques de rematar. Mentres, as cantidades aportadas polos barcos son insuficientes para amortizar unha débeda que ao mesmo tempo impide o acceso ás subvencións públicas.  

Novas relacionadas

• 12-06-17: A Confraría de Malpica pide compromiso a todo o sector para saír adiante
• 09-07-17: A Casa do Pescador non se dá vendido.
• 26-05-17: A crise da confraría de Malpica obrígalle a subastar varios activos.
• 2013: Denuncian o abandono do legado de Lugrís na Casa do Pescador de Malpica.

Fonte

• Redacción de QPC ([email protected]).
• PSdG