A MZ volveu convertirse no centro do sector gandeiro de Galicia
Sacou peito esta fin de semana o Concello de Mazaricos. O primeiro produtor de leite de Galicia organizou a Semana Gandeira, volvendo convertir a MZ no epicentro galego do sector gandeiro.
A poxa de gando frisón Memorial José Moreira foi, como todos os anos, o momento máis esperado. Este domingo, centos de persoas déronse cita no recinto feiral da Picota para participar neste proceso de compra e venda dos mellores animais do pais.
18 vacas saían a poxa e todas finalmente atoparon novo fogar. Ollo coas cifras, ademais, porque os 18 lotes vendéronse sumando un total de 52.300 euros de negocio, sendo o prezo máis alto acadado de 4.600 euros por unha das vacas.
Ao finalizar a poxa sorteáronse máis de 2.000 euros en premios para as persoas asistentes e para os compradores, incluíndo dende produtos e materiais agrogandeiros a produtos gastronómicos e mesmo estancias en balneario.
O Cumio a unha semana de actividades
A poxa supuxo o peche dunha semana de actividades onde as nenas e nenos de Mazaricos puideron achegarse a distintos exemplos de explotación gandeira ou de produtor agrícola en Galicia.
A xornada do sábado 30 foi completísima, con actividades todo o día, como a exposición agraria e de servizos, a sesión vermú e xogos para toda a familia. A pesar da chuvia e o vento, ducias de persoas acudiron para desfrutar do día no recinto feiral da Picota.
Dende as 12h da mañá, a gran sesión vermuuuuu foi amenizada por DJ Rokiño. Dende as 13h emitiuse en directo o programa A Vivir las Rías de Cadena SER dende o Recinto Feiral, conducido pola xornalista mazaricá Mayte González. No programa avaliouse a situación do sector lácteo e puxéronse en valor as posibilidades gandeiras e turísticas de Mazaricos. Interviñeron o alcalde, Juan Blanco, ademais de Xoán Ramón Alvite, da organización da Semana Gandeira, e David Carreira, do Asador Manduca. Tamén participaron no programa Juan Velo de Farming Agrícola, Xusto Mourín de Africor e José Louro de E.Nova Enerxía.
Os Concursos
Á tarde entregáronse os premios dos concursos desta edición, tanto o de fotografía como o de postres lácteos. Neste último avaliábanse receitas que contivesen leite como un dos ingredientes principais. Un ano máis a creatividade foi a norma xeral entre as sobremesas a concurso, con pratos variados onde o leite se fundía con todo tipo de produtos do país.
Foron premiados a torta de queixo con mel e decoración de noces de Xiana Fernández Silva (1º premio), a torta Saint-Honoré recuberta de nata de Carmen Candal (2º premio) e mais o biscoflán de Uxío Riveiro (3º premio).
En canto ao concurso de fotografía, o xurado escolleu as presentadas por Raquel Rial García (1º), Iván Castro Ordoñez (2º) e Raúl Formoso Lago (3º). Do mesmo modo, e a través de votación en redes sociais, recaeu un premio especial sobre a fotografía de Bruno Calvo Barreiro.
Os tres primeiros premios de ambos concursos consistían nunha cea para seis persoas (1º premio), outra para catro persoas (2º premio) e unha terceira para dúas persoas (2º premio). Todos os premios eran intercambiables por vales de compra no comercio local (a razón de 25 euros por persoa). O premio especial para a foto máis votada en redes sociais é unha cea para catro persoas, que tamén pode trocarse por vales de compra segundo o mesmo sistema.
