A comunidade educativa do IES Ramón Caamaño de Muxía sinte un gran orgullo polo seu alumno Iker Quintáns Casal que vén de recibir o Premio da ESO ao esforzo e á superación persoal, convocado pola Consellería de Educación, Ciencia, Universidades e Formación Profesional da Xunta de Galicia.

Este galardón recoñece o traballo constante e o esforzo diario que o alumno demostrou ao longo de toda a súa etapa na ESO, durante a cal manifestou un alto nivel de resiliencia e superación, a pesar das súas circunstancias persoais e individuais. No centro, sempre se caracterizou por un carácter afable, empático e conciliador, sendo moi apreciado tanto polos seus compañeiros/as como polo profesorado.

Malia as dificultades que a súa situación requiría, o alumno amosou unha enorme capacidade para afrontar as actividades diarias do instituto, destacándose pola súa fortaleza e superación, e converténdose nun exemplo a seguir por todas as persoas que formamos parte da comunidade educativa.

Desde o centro desexan que o alumno acade os soños e as metas que se propoña, pero sobre todo que siga sendo a persoa marabillosa que é.