Bota o PP máis lume á cachela prendida no seo do goberno socialista de Ponteceso. O voceiro popular Daniel García Cotelo recoñece que “non lle pilla de sorpresa a crises socialista. Sabíamos que estaban descontentos, pero non sabíamos que estaban tan descontentos”. Para García Cotelo é clave a postura do teniente alcalde, que ata o de agora era a man dereita do alcalde pero que de repente cambiou a súa postura.

Cotelo entende que “traballar como alcalde e como profesor non é viable, sobre todo se non hai unha persoa de confianza que quede ao mando no Concello”. Por iso entende que a “situación é ingobernable”, e pide aos 5 edís que dean un paso adiante para sacar o concello desta crise institucional: “O problema teñen que solucionalo os que o xeraron. Ou dimite o alcalde, ou que o boten fóra. Que pasen ao grupo dos non adscritos, e que falen con nós para sacar adiante unha moción de censura”, explica. “Como esperen e botemos 3 anos con el a medias, aos 3 anos vailles facer como lles fixo aos anteriores”.

García Cotelo avísalle a Carballido de que “o problema non é o seu soldo”, e explica que a moción da baixada de soldo serviu para medir o descontento dos seus edís. E aproveita para lembrar como rompeu ou tripartito, como “deixou tirados aos anteriores concelleiros”.

Así, García Cotelo pídelle que “sexa coherente, e abandoe a alcaldía polo ben dos veciños de Ponteceso. Non se aferre ao sillón, pois isto é como o título da película Crónica dunha morte anunciada”.

Novas do caso #PSOEPonteceso

• 30-07-2020: Unha sentenza corrixe por fin a situación dos empregados do GES de Ponteceso.
• 29-07-2020: Carballido renuncia á súa minguada dedicación e pide o reingreso no Instituto.
• 28-07-2020: Mar de fondo nos grupos socialistas de Muxía e Ponteceso.
• 20-06-2020: 3 edís socialistas apoian a Faustino Lema, cesado “unilateralmente” polo alcalde por “opinar priorizando o interese dos veciñ@s”.
• 14-06-2020: Faustino Santiago explica o seu cese como edil pontecesán: "Non é falta de confianza, é abuso de poder do alcalde”.
• 28-05-2020: Carballido bota outro membro da súa corporación.
• 2019: Socialistas de Ponteceso critican ao alcalde
• 2019: Militantes socialistas de Ponteceso critican o incumprimento o procedemento na elaboración da lista.