O BNG de Santa Comba sinala a inacción do goberno municipal para poñer fin aos problemas do SAF
Continúan os problemas, desde hai meses, no Servizo de Axuda no Fogar (SAF) do Concello de Santa Comba. Así o vén denunciando o BNG xalleiro, que mesmo ten solicitado á Xunta que se faga cargo do servizo, ante a "inacción" do goberno municipal. I é que a situación para as traballadoras e aos 90 familias usuarias segue a ser de precariedade absoluta, trala falta de avances entre o goberno socialista e o sindicato CIG-Administración Pública.
Denuncia esta semana Juan Sixto, que a "inacción queda demostrada na última subvención solicitada ao respecto á Deputación da Coruña, onde o Concello realizou unha solicitude de soamente 49.000€ na súa partida orientada ás traballadoras “fronte aos 70.000 solicitados desde un concello veciño como o de Mazaricos, con menos da metade de poboación”. Asemade, destaca que o monto para funcionariado de persoal técnico nas escalas superiores chega aos 60.000€, cando “a urxencia do servizo está no corpo laboral”.
O voceiro do BNG critica que “en ocasións anteriores o Concello ten sinalado ás traballadoras acusándoas de absentismo laboral, cargándoselles as responsabilidades cando están no límite físico e mental por unha carga excesiva que non se debería ter acadado baixo ningún concepto”. Así, a “única situación límite é a falta de organización do Concello”, que “non está a cumprir co convenio que o mesmo equipo de goberno asinou”, e que incluso leva a que as persoas que se encargan da labor vaian cambiando os domicilios aos que acoden “de tal xeito que é imposible xerar o clima de confianza necesario para realizar a súa labor con eficacia”.
Debido a esta situación, dende o Concello búscase unha solución de compromiso que incluiría a subcontratación do servizo a unha empresa externa, "solución esta que non convence ás persoas prestatarias do mesmo por ser unha responsabilidade do goberno", segundo o BNG, que tamén recoñece que a situación "vén de lonxe", "xa que a irresponsabilidade que deriva nesta situación xa procede do anterior goberno do PP.
Pide o portavoz nacionalista, Juan David Sixto, que dende "a institución de goberno se busque poña fin a esta situación de precariedade e que se enfoque en ofrecer condicións laborais dignas que permitan que o convenio se cumpra e os turnos se acollan ao indicado”.
