Despois da proba de hai un par de anos, esta vez van en serio. Mazaricos e Santa Comba, ademais do Concello de A Baña, van instalar “pasos de vacas” fixos nas súas rúas. O Concello xalleiro xa cambiou as cebras polas vacas na mesma porta do Concello, no marco dunha iniciativa de Casa Grande de Xanceda.

Un xeito de visibilizar a posta en valor da vida no rural, de defender o sector da Gandeiría en xeral e do sector lácteo en particular; de deixar claro que as vacas forman parte da nosa cultura, da nosa vida.

Xa contamos no seu día que Mazaricos, Santa Comba e Dumbría contan máis vacas que persoas, e se en toda Galicia non chegamos aos 3 millóns de persoas, si que superamos o millón de vacas.

Con esta iniciativa, os concellos queren recordalle á cidadanía que “Galicia é o territorio que máis leite produce de toda España”, dando sustento a máis de 8400 familias.

Ademais intentan potenciar a vaca, “o símbolo da Paz”, segundo Castelao, como a imaxe do país, esa imaxe que tanto nos representa.

Novas relacionadas

• Mazaricos, Santa Comba e Dumbría contan máis vacas que persoas.