Xoves. 11.08.2022
El tiempo

Nace en Santa Comba unha Asociación de Apoio a doentes do Cancro e familiares

  • A presentación da Asociación será o vindeiro martes 5 de Xullo na Sala de Xuntanzas do Centro de Saúde “Ángel Carracedo” de Santa Comba ás 13:30h.
Asociacion Cancro Santa Comba
Nace en Santa Comba unha Asociación de Apoio a doentes do Cancro e familiares

“Unha Amiga sabe ver que necesitas unha aperta” é o nome da nova asociación que a sociedade civil de Santa Comba está a crear para axudar aos enfermos de cancro e as súas familias. Os promotores pretenden agrupar a doentes e familiares de enfermidades oncolóxicas tanto para compartir inquedanzas comúns, como para visibilizar a realidade e a esperanza dunhas enfermidades con crecente incidencia na Terra do Xallas.

A entidade xorde dun grupo de afectados e de familiares que nos últimos anos tiveron ou teñen que convivir co cancro, unha enfermidade que aínda segue sendo case “tabú” na sociedade rural galega. Esta iniciativa tratará de dar luz a doentes e familiares, de compartir apoio e inquedanzas, de divulgar e de visibilizar o cancro como unha enfermidade superable.

A asociación nace co inestimable apoio do cadro directivo e médico do Centro de Saúde de Santa Comba, consciente da necesidade que familiares e doentes desta enfermidade se relacionen e de que xurdan terapias psicolóxicas e actividades de promoción de hábitos
saudables. Tamén o Concello de Santa Comba colaborará coa cesión de espazos para xuntanzas e actividades que promova a asociación.

A primeira directiva estará presidida pola xalleira Ana María Ferreiro, con José Manuel Vázquez, Huelvis, como secretario. Dous dos principais obxectivos desta iniciativa asociativa son o de crear un programa de voluntariado testemuñal e social que sexa quen de reunir periódicamente a doentes e familiares; e realizar encontros con outras asociacións de saúde e/ou orientadas ao cancro para compartir inquedanzas e obxectivos e ir construindo unha rede de apoios para os doentes e familiares desta comarca.

comentarios