Outro produto turístico creado pola veciñanza, neste caso pola Asociación Costavales, regalado ás administracións. Pero como no Camiño dos Faros, as administracións tardan en responder. 

Así acontece coa Vía Céltica, o sendeiro peregrino que une Compostela cos portos da Costa da Morte, que segue esperando a que a Xunta o  oficialice o Camiño.

Para esixilo, o resposable local do BNG de Santa Comba, Juan David Sixto, reuniu ao presidente da Asociación Costavales, Manuel Amigo, que tanto ten feito por este recurso patrimonial e turístico de "primeiro nivel para Santa Comba e para a Costa da Morte", cos membros do BNG provincial, Xosé Regueira, vicepresidente e responsable da área de Turismo da Deputación, o deputado de Patrimonio, Xosé Luis Penas, e a deputada de Cultura, Natividade González.

"A Vía Céltica é un recurso de especial interese para Santa Comba porque é o Camiño de Santiago que ten máis presenza no noso territorio e é necesario desenvolver iniciativas para a súa mellora e promoción", sinala Juan David Sixto que defende dúas liñas de actuación de carácter urxente para a protección e difusión da ruta. Sixto pide que o seu concello se implique na limpeza e broce dos camiños, algo que deberían facer todos os Concellos polos que pasa o sendeiro (Ames, Zas, Vimianzo, Laxe, A Laracha, Coristanco, Ponteceso, Malpica, Cabana de Bergantiños, Cee, Val do Dubra ou Camariñas), pero que ás veces non acontece, como vimos recentemente co Camiño dos Faros ao seu paso por Muxía.

En todo caso, e para evitar que a limpeza dependa da vontade do Concello de turno, instan á Xunta a "axilizar a oficialización da Vía Céltica que sería a mellor maneira para traballar na súa protección e promoción e mesmo para dar pasos decididos de colaboración dos distintos concellos que atravesa o trazado para traballar conxuntamente no futuro".

Máis novas