Uns 40 profesionais do sector agro-gandeiro asistiron ao faladoiro sobre "Xestión Gandeira e de Forraxes" artellado polo GDR Costa da Morte no marco do proxecto de Cooperación "Paisaxes Intelixentes". A Casa da Cultura vimiancesa acodía esta cita que trataba de informar sobre as novas estratexias e lexislación referidas á xestión sostible das explotacións gandeiras de vacún: a nova PAC; o benestar animal e a bioseguridade; os requirimentos medioambientais das explotacións; a implantación de pradeiras en terreos de monte como alternativa aos cultivos forraxeiros.

Tamén se ofreceu unha visión global do mercado do leite a as novas tendencias de consumo. Destacouse que a xestión gandeira sostible das explotacións é esencial para producir alimentos de forma continuada preservando os recursos e co menor impacto ambiental posible, ademais de ser unha resposta á crecente demanda de alimentos de calidade por parte dos consumidores.

As temáticas centrais deste faladoiro foron as seguintes:

• Aplicación práctica da nova PAC.
• Implantación de pradeiras en terreos de monte.
• O benestar animal e a bioseguridade nas explotacións de vacún.
• Requirimentos medioambientais nas explotacións de vacún.
• O mercado do leite e as esixencias do consumidor e da cadea láctea.

Ao remate, os asistentes recibiron un agasallo consistente nun paquete de 300 gramos de Faba Galaica producida no territorio, e gozaron dun aperitivo cuns viños e uns pinchos continuando o debate iniciado na rolda de preguntas do faladoiro.