Unha semana é o tempo que levan traballando os arqueólogos Tito, Dolores, Martín, Maria José e Adelaida, a resturadora Candela e o auxiliar de arqueoloxía Damián, a maioría deles da empresa Terra Arqueos, na nova campaña de escavación do Castro das Barreiras, en Ogas (Vimianzo).

“Levamos o ritmo previsto, posto que a chuvia constante da semana pasada impediunos unha escavación manual en condicións”, explicaba onte Tito Concheiro, o arqueólogo director do proxecto. Concheiro xa desenvolveu unha campaña de escavación similar durante o ano pasado na que se descubriron restos de, polo menos, dúas construcións de grande tamaño, así como máis de medio milleiro de fragmentos de cerámica –incluso metalúrxicos- que daban testemuño da pequena e potente duración deste singular asentamento, datado polo propio Tito na segunda Idade de Ferro, entre os séculos III e I antes da nosa era.

Durante esta campaña, á que lle pensan dedicar entorno aos dous meses de traballo, ampliarase a perforación feita ata agora, abrindo unha área de 16x18 metros, escavarase o interior da muralla e consolidaranse as estruturas atopadas na escavación anterior. “ Na semana que levamos, seguimos descubrindo unha das casas do ano pasado, a ovalada, e xa sabemos da traxectoria dunha nova. Trátase dunha casa redonda pero que se mete no perfil norte”, apunta Concheiro.

Así mesmo, e como xa aconteceu o ano pasado, este equipo de traballo –que conta con moitos anos de experiencia noutros castros de Galicia- xa deu con varios restos de cerámica (a maioría lisa, aínda que tamén a hai decorada), algún material lítico e sangue telar, “o que demostra que no Castro das Barreiras tamén se practicaba o artesanado do tecido”, explica o director da escavación.

Parte do borde dun recipiente cerámico atopado estes días no Castro das Barreiras

Escavación aberta ao público

“É imposible escavar as Barreiras sen que estas estean vivas. É un castro único en Galicia, coas mellores condicións de visita e de posta en valor”, di Concheiro, ao que moitos veciños paran polas rúas vimiancesas para preguntarlle como van as escavacións: “O equipo desprazouse ata aquí para, así, integrarnos no tecido social da vila. E a verdade é que non hai día que non saiamos do hostal e a xente se interese pola escavación” [ri].

Por outra parte, para Concheiro é fundamental o apoio por parte do concello. “Estamos moi arroupados por toda a corporación. É unha honra que un concello tan pequeno como Vimianzo aposte pola arqueoloxía como motor turístico”.