O Goberno de Vimianzo acusa á oposición de seguir poñendo trabas
Completa foi a semana pasada en Vimianzo en materia política. A denuncia da ex concelleira do PSOE ao alcalde por suposta chantaxe, a petición dos edís censores dun pleno para eliminar a dedicación exclusiva do alcalde e a leña ao lume do PP protagonizaron días de voráxine política no concello soneirán.
Hoxe, o grupo de goberno, alterado por tanto movemento, acusa á oposición de “seguir intentando poñer trabas ao normal funcionamento do concello”. Non entenden que os censores “ intenten impedir que os presupostos do presente ano sexan aprobados, nunha nova tentativa de frear o funcionamento normal do traballo municipal, que o único que consegue é impedir dar o servizo que lles corresponde aos veciños e veciñas de Vimianzo”.
Denuncia o grupo do BNG que “o seu único fin destruír e derrocar o Alcalde”. Por iso, queren deducir dende a alcaldía que “presentamos uns bos presupostos, cando non hai ningunha cuestión deles á que fagan referenza”. I é que “os presupostos municipais foron debatidos en dous plenos sen que ningún dos concelleiros que agora presentan este escrito votase en contra dos mesmos, “non é de recibo que intenten agora boicotealos co fin de paralizar o concello”.
Remata o alcalde lamentando que “se estivesen interesados en mirar polo ben dos veciños farían propostas construtivas e non investirían o tempo en buscar artimañas para ver de que xeito poden impedir que o goberno traballe polos veciños”.
Novas relacionadas
- O PP vimiancés bota leña ao lume municipal.
- Condenado o ex alcalde de Vimianzo por un delito de coaccións leves contra a súa ex parella.
- 30-04-14: Os censores convocan un pleno para eliminar a dedicación exclusiva do alcalde vimiancés.
- 29-03-14: A política ponse de costas en Vimianzo.
- 12-03-14: O PSOE expulsa provisionalmente aos edís promotores da fallida moción de censura.
Fonte
- Nota de prensa do grupo de goberno do Concello de Vimianzo.