O pleno do pasado luns tiña a aprobación do IV Plan de Igualdade de oportunidades entre homes e mulleres para os anos 2022-2026, como puno forte da orde do día. Un plan que nace como “estratexia metodolóxica para a implementación das políticas de igualdade en Vimianzo; nace para permitir a incorporación da perspectiva de xénero na administración local; nace para promover unha concienciación real de toda a cidadanía sobre a sociedade patriarcal na que vivimos e como iso configura quen somos e como nos comportamos; nace para ser conscientes das consecuencias e das causas da desigualdade estrutural coa que convivimos; nace para promover a participación das mulleres, para darlles voz, para facelas visibles e poñer en valor o traballo e as súas aportacións á sociedade; nace para loitar activamente contra calquera violencia cara a muller, polo simple feito de selo”.

Pero había máis cousas na orde do día, como o ditame sobre a modificación da Ordenanza Fiscal número 17, reguladora da taxa por prestación de servizos e utilización de instalacións culturais, educativas, deportivas e análogas de titularidade municipal ou o Plan de medidas anti fraude para a xestión dos fondos “Next Generation UE”.

Por exemplo temos novas tarifas de utilización do ximnasio en euros/hora:

• Matrícula: 10 euros
• Abono individual adulto: 20 euros/mes
• Abono individual xuvenil: 15 euros/mes
• Abono individual diversidade funcional: 15 euros/mes
• Abono individual matinal: 15 euros/mes
• Abono Carné Xove: 15 euros/mes
• Entrada libre adulto: 3,50 euros
• Entrada libre especial: 2,50 euros.

Ademais, para actividades dirixidas, as tarifas quedan da seguinte maneira:

• Adestramento para grupos reducidos, 2 horas á semana: 8 euros abonados, 15 euros non abonados.
• Adestramento grupos reducidos, 3 horas semanais: 15 euros abonados, 20 euros non abonados.
• Outras actividades dirixidas, 2 horas semanais: 8 euros abonados, 15 euros non abonados.
• Outras actividades dirixidas, 3 horas semanais: 15 euros abonados, 20 euros non abonados.