Avanza, paseniño, o Polígono de Vimianzo. E para darlle un novo impulso e conseguir achegar novas empresas, a sociedade estatal Suelo Empresarial del Atlántico, e o Concello de Vimianzo veñen de manter novas reunións con empresarios para promocionar o parque empresarial e dar a coñecer as diferentes posibilidades que existen para iniciar a actividade no polígono, entre os que destaca o sistema de Lei de Superficie.

Debullaron a oferta de ata 40.000 metros cadrados en Dereitos de Superficie, un sistema que permite a instalación no polígono industrial sen necesidade de comprar as parcelas de forma inmediata, como un Aluguer con opción a compra.
Así, as cantidades que terían que pagar as empresas oscilan en torno a só 1.000 euros anuais. Ademais, para facer máis atractiva esta opción, seleccionáronse as parcelas de maior visibilidade, aquelas que están situadas no acceso ao parque empresarial, e habilitadas tanto para uso industrial, mixto e terciario.

Paralelamente, tamén se informou da rebaixa do prezo da parcela nesta modalidade, ao rebaixarse ​​o canon e equiparala ao prezo de venda. Como exemplo, unha parcela de 1.000 metros cadrados ten un custo en Dereitos de Superficie de 1.022 euros o primeiro e segundo ano (85 euros mensuais) e só 1.700 o terceiro ano.
Ademais, tras a modificación promovida este ano, estas parcelas poderán ser reservadas tanto para Dereitos de Superficie como para a súa venda, co fin de evitar reducir as opcións e, ao mesmo tempo, permitir ás empresas interesadas optar por ambas as dúas modalidades.

O polígono ten unha superficie bruta de 335.095 metros cadrados e unha superficie neta de 169.236.