Está de moda o audiovisual, non cabe dúbida. E os concellos van adheríndose a este medio como poden a través dos seus alumnos. Así o vimos co gallo do 25N nos concellos de Ponteceso e Cee, con sendas curtas contra a violencia de xénero máis que interesantes.

Hoxe desde o concello de Vimianzo nos informan da nova campaña que abren co gallo do I Concurso de curtas co móbil que se está a artellar dende as Aulas da Rede CeMIT dos concellos de Abegondo e Vimianzo. Concurso no que poden participar rapaces e rapazas que estean cursando a ESO ou Bacharelato de toda Galicia, cunha idade comprendida entre 14 e 20 ano.

Esta iniciativa ten como finalidade fomentar o traballo en equipo entre o alumnado dos centros educativos participantes, así coma o uso da Lingua Galega nas TICs, explorar e dar a coñecer a creatividade audiovisual presente na poboación estudantil e utilizar as aulas CeMIT como un espazo para a creación e para a comunicación.

Dúas fases

O concurso constará de dúas fases:

• Fase provincial (votacións dende 07/03/2012 ata o 08/04/2012)- Seleccionarase a curta gañadora por cada provincia de entre todas as presentadas.
• Fase Autonómica (votacións dende o 18/04/2012 ata o 20/05/2012.)- De entre catro curtas finalistas, elixirase a curta gañadora.