Este pasado xoves unha expedición institucional achegouse ata Tufións, en Vimianzo, para botar un ollo ao remate das obras de mellora da estrada. Case medio millón de euros para ampliar a plataforma da estrada DP-1603 e a construción de novas sendas peonís nas marxes, ademais da renovación do firme da vía mediante aglomerado e renovar o alumeado.

“A veciñanza de Tufións por fin pode pasear e circular con seguridade nesta vía”, aseguraba o presidente da Deputación Valentín González Formoso. “Era unha vella demanda da veciñanza”, lembrou a alcaldesa Mónica Rodríguez.

Esta obra completarase co novo nvestimento provincial de 178.063 euros para renovar a capa de rodaxe entre os puntos quilométricos 1+315 e 2+865 (desde Porto de Cereixo a Tufións), completando así as melloras desta estrada provincial. As obras, explicou o presidente, están xa en fase de licitación pública.

Tamén visitaron tamén o centro sociocultural, que renova a súa imaxe exterior, aposta pola eficiencia enerxética e crea unha nova aula interior cun investimento de 153.000 euros do Plan Único.