Zas continúa coa súa intensa programación cultural de verán nas Torres do Allo, que se preparan para acoller unha das citas máis distinguidas da tempada. O vindeiro sábado 11 de xullo, ás 19:00 horas, o pazo será o escenario do concerto de Aida Piano Trío, unha formación que está a consolidar a súa presenza na primeira liña da música de cámara europea e que ofrecerá unha experiencia artística única combinando cultura e patrimonio.

O trío, integrado por Esther Zaglia (violín), Clélia Le Bret (cello) e Sofía Medina (piano), é amplamente recoñecido pola sensibilidade das súas interpretacións e a súa capacidade para conectar co público. Formado no prestixioso Royal College of Music de Londres, o grupo continuou perfeccionándose na Stauffer Academy de Cremona (Italia) baixo o mestrado de Bruno Giuranna, e refinando a súa identidade artística coa guía de figuras da talla de Danny Driver, Dina Parakhina ou Alexander Chaushian.

Para a súa presentación nas Torres do Allo, Aida Piano Trío deseñou un repertorio coidadosamente seleccionado que convida ao público a realizar unha viaxe musical a través de diferentes estilos e épocas, espremendo ao máximo a acústica e a maxia dun contorno arquitectónico singular.