Mércores. 30.11.2022
El tiempo

Solicitan a inclusión de varias Brañas da Costa da Morte no Catálogo de Humidais

Brañas da Serra Castriz-Santa Comba
Imaxe da Braña da Serra, en Castriz, Santa Comba
Solicitan a inclusión de varias Brañas da Costa da Morte no Catálogo de Humidais
No marco da loita contra os eólicos, a entidade Ecoloxistas en Acción vén de presentar un informe técnico ante a Xunta para propoñer a inclusión no catálogo de humidais galego dunha serie de hábitats desta natureza. Entre eles atopamos as Brañas da Serra (Santa Comba e Coristanco), e as Brañas da Calzada (Zas), ademais das Brañas do Espindro (Laracha/Cerceda), e as Brañas e turbeiras de Valadares e Banzas (Outes), entre outras.
Brañas da Calzada en Zas
Brañas da Calzada en Zas

A asociación trata coa campaña de sensibilización ‘Humidais para a vida’ “concienciar á poboación galega da importancia das brañas e turbeiras e das agresións ambientais que sofren constantemente estes hábitats prioritarios malia seren zonas de alto valor ecosistémico”.

”As zonas húmidas son indispensábeis polos innumerábeis beneficios ou servizos ecosistémicos que brindan á humanidade, desde subministración de auga doce e alimentos, acubillo de biodiversidade, até o control do aumento do caudal dos ríos, recarga de augas subterráneas e mitigación do cambio climático, así como a captura de CO2 como no caso das turbeiras”, afirma Roberto Vilela, voceiro de Ecoloxistas en Acción.

A entidade lembra que dende a creación do Inventario aló por 2008, a Xunta só incluíu unha única zona húmida en réxime de protección (o parque nacional das Illas Atlánticas) a pesar de contar cun informe propio con máis de un milleiro de humidais que demandan un coidado extremo.

comentarios