Sábado. 01.10.2022
El tiempo

Zas quedou pequena para a gran volta da Festa da Carballeira

Foton da Festa da Carballeira de Zas
Zas quedou pequena para a gran volta da Festa da Carballeira

Éxito total na volta da Festa da Carballeira de Zas tras dous anos sen festa. Había moitas gañas de volver encher de vida a Carballeira de Velar, e así o demostraron os milleiros de amantes da música folk que acodiron á chamada desta 37ª edición do festival máis lonxevo da Costa da Morte. Xentes chegadas dende Zas, dende a Costa da Morte, pero tamén dende moitas partes de Galicia.

Máis alá da música, a xente destacou a gran organización (máis de 100 persoas velaron porque todo saíse perfecto a pesar dalgunha cola dificilmente evitable con tales cantidades de xente) e o respecto pola contorna que tan ben vén pedindo a organización coas campañas medioambientais que poñen en valor o máxico auditorio natural.

Herdeiros da Crus na Carballeira
Herdeiros da Crus na Carballeira

Daba o pistoletazo de saída o venres pola noitiña o presentador Roi da Costa, co clásico “Eiiiii Carballeira!”, xa coa carballeira chea. Porque poucos venres como este se viviron na festa zaseira. Entre as gañas de troula e o tirón dos eternos Herdeiros da Crus a carballeira estaba a rebentar. De feito, o “eu queeeeero, eu quero josar” escoitouse na autovía do que berraron os asistentes, que disfrutaron dunha das mellores actuacións en 30 anos da banda galega.

Público entregado na Carballeira de Zas
Público entregado na Carballeira de Zas

Mileth foi o grupo encargado de poñer punto e final a unha primeira xornada na que todos e todas os presentes desfrutaron de boa música en directo, dun ambiente inigualable e da preciosa entorna que rodea este espazo.

Xabier Díaz
Xabier Díaz

A xornada do sábado arrincaba cunha sesión vermú espectacular. Xabier Díaz e as Aduferias de Salitre provocaron que se superaran todas as expectativas posibles quedando pequeno o espazo, creando un ambiente inigualable e excepcional entre todo o público.

Xabier Diaz e as Adufeiras de Salitre na sesión vermú da Carballeira de Zas
Xabier Diaz e as Adufeiras de Salitre na sesión vermú da Carballeira de Zas

Á mesma hora abriron as portas da feira de artesanía con postos de todo tipo: roupa, mimbre, xogos feitos en madeira, instrumentos tradicionais, cosmética natural, bisutería, etc.
As gaitas e as pandeiretas foron as outras dúas grandes protagonistas da xornada, elas e máis o baile. O público non deixou de bailar durante toda a mañá e a tarde, parando únicamente a repoñer forzas coa comida e bebida. A mexilloada popular foi un ano máis un éxito entre todos os asistentes.

A malpicá Icía Varela con Arredores na Carballeira
A malpicá Icía Varela con Arredores na Carballeira

Tras a foliada e o grupo Arredores, a noite deixou sitio para máis festa coas actuacións de Deira, Xisco Feijoó, Rura e Sondarúa. Os encargados de abrir o turno da noite foron os integrantes de Deira, unha banda de folk composta por un asturiano e dous andaluces que crean un estilo moi personal e auténtico que gustou moito aos alí presentes.
Xisco Feijoó puxo a bailar a toda a Carballeira facéndoos entrar en calor. A versatilidade deste artista non deixou indiferente a ninguén e desde logo que quedaron gañas de que volva.
Os seguintes foron o grupo escocés Rura, a aposta internacional do cartel deste ano que foi tamén un éxito entre os asistentes.

Público na Carballeira
Público na Carballeira

Sondarúa pechou esta 37ª edición co seu estilo combativo que non se fixo repetitivo. O grupo de rap galego puxo o punto final á edición máis esperada e desexada coas súas cancións cantadas polo público a pleno pulmón para despedir a festa como era merecido.

Son da Rua na Carballeira de Zas
Son da Rúa pecharon a Carballeira

A CARBALLEIRA EN IMAXES

Novas relacionadas

 

comentarios