A forza dos Penedos de Pasarela

Firmas QPC Vimianzo

10:35 27/05/11

Os meus amigos da familia Penedos de Pasarela están de festa. Disque haberá varias xornadas de celebración na casa de dona Pena Forcada porque está feliz polo triunfo do seu amigo Antelo Pazos. Aló enriba o comentario é que estiveron empurrando para que fose alcalde unha persoa de corazón. Só pedían que fose home de sentimentos. Ata agora querían facer con eles negocio mediante a súa morte nunha canteira porque o anterior alcalde foi sempre un grande elaborador de insensatas conclusións. A verdade é que case non se lle coñece un pensamento razoable. As súas afirmacións facían rir a todos pero os votiños seguían enchendo o seu peto coas achegas de miles de paspáns das parroquias vimianzesas. Os seus votantes eran de dúas clases: a) non interesados que o votaban porque lles vendera aceite en garrafas de cinco litros pola casa; b) interesados en obter un traballiño para o fillo, sobriña ou neta.

Parecía cousa do demo ou máis ben dalgún meigallo albeiteiro de que fermoso val de Soneira estivese ancorado no medio do retraso. Un alcalde con intereses particulares no concello gaña unha e outra elección tal coma se os votantes estivesen detrás das migalliñas que se lle puidesen caer dos seus petos. Din os que saben que xamais viron un mioliño de pan polo chan. Parecía eterno ao abeiro dun gran partido que miraba para outro lado cando botaba man do seu amplo repertorio de imbecilidades varias. Houbo que expusalo cando pide o voto para outro partido logo de ter pactado durante toda a lexislatura.

Pero todos temos o noso San Martiño, uns antes e outros despois, así que agora o alcalde queda fóra do poder porque non ten con quen pactar. Non o queren nin de comparsa nin de solista. Son as cousas da vida. Haberá quen diga que Antelo Pazos non foi quen de ter maioría absoluta e haberá quen diga que o agora independiente mantivo o tipo. Non sei eu...pode ser. Agora ben, hai que dicir que o triunfo nacionalista é o resultado de anos de traballo municipal en contra dun xeito túzaro de gobernar. Non foi doado porque Vimianzo, meus amigos, non é Zas. Aquí somos conservadores das tradicións e unha delas era de ter un alcalde do gremio albeiteiro.

Non ten o futuro alcalde Antelo Pazos un camiño de rosas, non. No seo mesmo do concello hai autocompracencia, inoperancia e tamén a máis alta porcentaxe de enchufismo de toda a Costa da Morte. Hai contratados que cobran sen traballar e hai quen traballa ben que está no fío da navalla. Calquera sabe que hai excedente de persoal e que lamentablemente a casa está sen varrer. Entre os preguiseiros e nos que non a rascan estamos a falar dunhas 40 persoas. Sen botar moitas contas son medio millón de euros anuais estragados. A familia Penedos de Pasarela ofrece os seus servizos sen cobrar un peso. Eles queren axudar coa súa monumentalidade para que o concello reciba aos mellores turistas que son aqueles que falan coas nosas pedras. Os bos e xenerosos entran axiña en confianza e reciben consellos dos vellos prehistóricos. Os limpos de espírito saen sandados de calquera enfermidade cando sinten no seu interior a forza penediana. Hai un novo horizonte de ilusión para Vimianzo e xa ía sendo hora, digo eu.