Kafka

Firmas QPC

Kafka

09:30 24/01/13

Lía este xoves en twitter a alguén que dicía “En realidad, España es una especie de Gran Hermano que se esta emitiendo en el espacio exterior. Están viendo cuanto aguantamos antes de matarnos”.

E non podo estar máis de acordo.

Que algo cheiraba a podre no PP algúns o viñamos dicindo dende hai anos (e outros dende hai décadas). Non é nada novo, o novo é ver as probas físicas de que o que diciamos era certo. Rajoy, De Cospedal, Trillo, Aceves, Arenas, Cascos, Aznar. Todos cobraron. Así o afirma o xornal El País e, aínda que a redacción desta columna o ignoro, supoño que hoxe venres o xornal publicará máis novidades.

“Negativa que no niega” afirman que manifestou Ben Bradlee cando recibiu o primeiro comunicado da Casa Branca que negaba todas cantas afirmacións se facían no xornal que por aquel entón dirixía, o Washington Post, o respecto do que logo se coñecería coma Watergate. Negativa que non nega.

O PP afirma sen inmutarse que todo o que cifran e detallan os “Papeis de Bárcenas” que publica El País é falso. O segundo seguinte, a mesma que di isto recoñece que, coma el mesmo afirmou, tal vez o presidente do senado, Pio García Escudero, si cobrou os cartos que figuran nesa contabilidade “pero en forma de préstamo que luego devolvio”. A ver María, ou si ou sopas. Ou é ou non é. Si o que din os papeis é falso é todo falso. Se isto é certo, tamén debe selo que ti e Mariano cobrachedes. Declaráchelo? Onde? A quen? A Facenda?, Cando? Como?

Mirade, vouvos dicir unha cousa. Non creo que o PP estea todo podre. Si, non o creo. Non se trata de ningún “envainamento”, tranquis. Creo nas persoas e o PP é enorme. Imposible a unanimidade.

Creo que Genova está podre. Creo que Mariano, Cospedal, Trillo, Aceves, Arenas, Cascos, Aznar... están podres. Podres de cartos e ebrios de poder. Manter ese estilo de vida, convites, festas, vacacións a todo trapo en Marbella (non como as miñas, a pe de chiringuito e cañas a 1,20€). Demasiado caro ata para un empresario dos potentes. O soldo de deputado non chega a nada, vaia por Dios. “Faime falla mais Luis” dicían todos. E Luís proveu, faltaría.

25.200€ o ano en dous pagos semestrais, segundo reflicte a información. Once anos seguidos. Declarounos Mariano?. Non o sei, porque as declaracións da renda dos señores deputados non se fan publicas. Eles declaran diante do congreso o seu patrimonio, e nada mais. Nada de declarar ingresos, salarios, vendas, rendas. Non. Patrimonio. Só iso.

Mariano, quero ver a túa declaración da renda. Non che creo unha palabra, es un mentireiro contumaz, un “falabarato”. Un embusteiro. Mentíchesme a min e a todos, ata os teus acólitos, os teus fregreses teimudos e abarregados. Ata a eles lles mentiches.

Cando lin “A Metamorfose” de Kafka tiña 16 anos e quedei confuso. Un cristo, para entendernos. Samsa esperta feito un bicho que nunca se sabe moi ben o que é. E a partires de aí todo empeza a carecer de sentido. Como aquí.

Un día espertamos e o soño dun futuro en paz esvaeceu. O país vaise o traste porque confiamos. Tiñamos todos tantas gañas de non ter que chegar as mans esta vez, de non ter que facernos valer a hostias, coma sempre. E, coma sempre, non puido ser. Acabouse a pirueta. O circo de tres pistas chegou a cidade e todo é ilusión. A democracia é ilusión. Un soño, un pesadelo. Un drama kafkiano.

Mentres, o PP tira da corda, a ver ata onde dá. Primeiro lexitimaron os pequenos defraudadores, os que fixeron autentico heroes. Roubas os bancos (o estado) para quedar cos cartos, ou darllos o panadeiro, ou o leiteiro, ou o carniceiro. Os gastan aquí, non en bankia.

Agora, lograrán que o primeiro deshauciado que decida, en plena enaxenación mental, abrirlle a cabeza a un deles a saída do congreso sexa outro mártir. Porque, se nin sequera eles respectan o pactado, se nin sequera eles son quen de manter as mans quedas nos petos e non roubar, non mentir, non atrapallalo todo de merda e lixo...Por que eu, ti, el, debéramos respectar o quinto mandamento?

Un día alguén, entre a espada e a parede, decidirá que é mellor morrer matando. E eu, a lo menos, entenderei por que.

Goberno dimisión. Rajoy dimisión. Eleccións anticipadas. Pásao.