Beatriz Mato e Félix Porto firmaron onte a orde de aprobación definitiva do Plan Xeral de Muxía Despois de cinco meses sen saber nada, onte o PXOM de Muxía viu a luz. A conselleira de Medio Ambiente e Ordenación do Territorio, Beatriz Mato, e o alcalde muxián, Félix Porto, firmaron na mañá de onte a orde de aprobación definitiva do Plan Xeral de Ordenación Municipal de Muxía, que - segundo indican dende o organismo oficial - "garante o equilibrio entre as actividades económicas tradicionais e o desenvolvemento de novas potencialidades do territorio, co obxectivo de apostar polo crecemento económico, ao mesmo tempo que se protexe a identidade do concello". A conselleira de Medio Ambiente salientou que o PXOM aprobado onte actualiza o planeamento urbanístico vixente en Muxía, moi básico e obsoleto, polo que co novo documento de planeamento contribuirase á mellor defensa e conservación dos valores naturais e ambientais. Tratase dun pan xeral que protexe as zonas máis sensibles e con maior riqueza natural, paisaxística, ambiental e cultural, que en Muxía son moi numerosas, xa que este concello ten parte do seu territorio incluído no Lugar de Importancia Comunitaria da Costa da Morte. Zonas verdes Mato destacou que o novo plan xeral aposta polo incremento de zonas verdes e incorpora a previsión da nova creación de arredor de 325.000 metros cadrados destes espazos; ao tempo que senta as bases para a mellora do servizo de abastecemento e saneamento de augas para todas as parroquias e todos os veciños. Recordou que é coherente co compromiso da Consellería de ofrecer un servizo da máxima calidade a todos os núcleos de poboación de Galicia que superen os 50 habitantes. “O Plan xeral de Muxía é o primeiro PXOM actualizado da comarca de Fisterra”, subliñou Beatriz Mato, ao que engadiu que dende a Xunta trabállase coa previsión de que pronto se poidan unir os plan xerais de Fisterra e Dumbría. O reto  é conseguir que non haxa ningún concellona comunidade sen planeamento de calidade, ao que se lle dará resposta coa nova Lei do solo.

Novas relacionadas

• 26-11-2015: U-lo PXOM de Muxía?
• 12-2014: Muxía saca adiante o PXOM a pesar das críticas da oposición.
• 05-12-14: Novidades nos PXOM de Carballo, Fisterra e Muxía.
• 21-01-13: Muxía avanza co PXOM.
• 2010: O BNG muxián preocúpase polo retraso do PXOM.
• 2009: O concello de Muxía presenta o PXOM.

Fonte

• Redacción QPC (info@quepasanacosta.com).
• Consellería.