Os sectores públicos Laracha fórmanse conxuntamente para mellorar a detección de casos de violencia de xénero
![Formación CIM e SS no centro de saúde-Laracha](/asset/thumbnail,992,558,center,center/media/quepasanacosta/images/2024/04/11/2024041111341972678.jpg)
Na última reunión da mesa de traballo sobre coordinación interinstitucional contra esa problemática social, un dos acordos tomados foi que persoal municipal do Centro de Información ás Mulleres (CIM) e do departamento de Servizos Sociais impartise unha acción formativa dirixida especificamente ao persoal do centro de saúde e punto de atención continuada da Laracha.
Onte levouse a cabo cos obxectivos de que os profesionais da área sanitaria teñan coñecemento de todos os recursos públicos que están a disposición das vítimas en materia de servizos sociais comunitarios e igualdade, revisar o protocolo de actuación para a derivación de pacientes ante posibles casos de violencia de xénero ou persoas en risco de exclusión social e explicar que tipos de informes médicos son requiridos pola administración en cada unha das xestións.
O Concello agradece e valora a continua colaboración de todos os sectores profesionais implicados que favorece a coordinación ante estas problemáticas e optimiza a atención integral ás vítimas e a prevención ante situacións de vulnerabilidade para beneficio xeral da cidadanía larachesa.