16 meses leva Xabier Macías traendo historias curiosas ao blog Crónicas da Laracha. Cada semana trae un artigo de alto valor patrimonial e histórico, recuperando  datos, información e fotografías sobre persoeiros laracheses que ao longo da historia destacaron en diferentes eidos (deportivo, cultural, artístico, político, etc.), pero tamén sobre antigas actividades, comercios, costumes, espazos, contos, lendas e outros moitos contidos de interese que están agora a disposición dos internautas.

O autor do blog acodiu ao Concello para formalizar a colaboración con esta iniciativa. O rexedor animouno a “continuar traballando na recuperación de todas esas informacións que poñen en valor tanto á xente larachesa como a historia do municipio”, incidindo en que “son de interese xeral, tamén forman parte do noso patrimonio inmaterial e sen o teu traballo se perderían para sempre”.

Xabier Maceiras apuntou que nos dezaseis meses de vida do blog Crónicas da Laracha recibiu preto de 44.000 visitas, das cales 2.000 foron conexións desde os Estados Unidos, máis de 600 desde Suíza e con presenza, tamén, de países como Francia, Irlanda, Arxentina, Canadá e Uruguai, entre outros.

Ademais, adiantou que cara o verán ten previsto publicar o seu primeiro libro de contidos exclusivamente relacionados coa Laracha, que versará sobre os antigos salóns de baile e que recompilará a serie de artigos sobre esa temática xa publicados no propio blog.
Tamén apuntou que está a traballar noutro libro sobre as antigas telleiras da Laracha que verá a luz previsiblemente a finais de ano. O noso municipio xa tivera presenza noutras dúas obras súas como son 100 anos de fútbol en Arteixo e A Laracha e Antoloxía das confidencias de Picadillo.