Íntegro forma once xardineiros en Buño

08:40 17/09/14

Foi inaugurado onte en Buño un curso que formará a 11 persoas con diversidade funcional para realizar pequenos arranxos de xardinería doméstica. O obradoiro, subvencionado pola Deputación Provincial da Coruña, terá unha duración de algo máis dun mes. As clases teóricas serán impartidas na Casa do Oleiro, onde tivo lugar onte pola mañá a presentación da actividade, e as prácticas realizaranse no xardín da praza situada no centro de Buño, xunto ao cruceiro. Os alumnos crearán xardíns con grava de ladrillo de Buño e ánforas de olería.

Unha actividade formativa que contribúe a mellorar o currículo dos participantes e a facilitar a súa inserción no mundo do traballo. Pero tamén destacaron o carácter social da iniciativa, dado que favorecerá as relacións e a comunicación entre os alumnos e as alumnas.

O monitor do obradoiro, Miguel Álvarez, explicoulles que o traballo comezará por aprender a manexar a maquinaria e por coñecer os sistemas de seguridade que deben utilizarse. Na parte práctica, engadiu, tamén aprenderán a deseñar un xardín “que practicamente non necesitará mantemento”. Nese sentido, a concelleira de Servizos Sociais explicou que o curso terá unha segunda parte no mes de abril para realizar o mantemento das zonas axardinadas que se van crear agora, e que ese labor continuará posteriormente a cargo do Concello de Malpica.

O presidente de Íntegro achegou un aspecto máis do proxecto. “O importante –dixo- é que se vexa Buño reflectido nel”. Nese sentido, no xardín utilizarase grava de ladrillo de Buño e na decoración, ánforas de olería. Plantas de tempada e arbustos completarán o deseño.