Martes. 12.11.2019
El tiempo

Camariñas aproveita o Serpent como reclamo cunha emotiva homenaxe e un completo programa

Evento de homenaxe ao Serpent no Cemiterio dos Ingleses
Evento de homenaxe ao Serpent no Cemiterio dos Ingleses
Camariñas aproveita o Serpent como reclamo cunha emotiva homenaxe e un completo programa

É, sen dúbida, un dos eventos máis emocionantes de cantos se fan ao longo do ano na Costa da Morte. Un espazo como o Cemiterio dos Ingleses, cheo de emoción, no marco da noite estrelada da punta do Boi, acolle cada 9 de novembro o acto conmemorativo polo 129 aniversario da traxedia do ‘HMS Serpent’, o cruceiro da Royal Navy que se afundiu en 1890 no corno da Punta do Boi deixando 173 vítimas.

Este ano o Concello de Camariñas adiantou o evento (das habituais 22:00h, hora que coincide co naufraxio, a unhas 19:00h máis asequibles), e mesmo dispuxo un bus gratuíto para os veciños e veciñas que quixeran vivir a homenaxe dende dentro. Era o acto central dun completo programa que vai medrando, e vai dando forma a un xeito de aproveitar turisticamente unha realidade tan simbólica como a dos naufraxios da Costa da Morte.

O acto contou cunha ofrenda floral (coa alcaldesa, ademais de Rafael Lema, José Manuel Pato e Juan Campos Calvo-Sotelo, da Real Liga Naval Española, a promotora real deste evento dende hai 11 anos) e unha representación teatral moi xestual.

Unha homenaxe que serve para “transmitir de xeración en xeración e manter no recordo para sempre a historia de cada un dos que aquí descansan e de todos aqueles aos que esta traxedia marcou a súa vida”.

Tapas dos naufraxios

Durante toda a fin de semana estivo activa a ‘Ruta das Tapas dos Naufraxios’ na que os 16 establecementos participantes ofreceron, por 1 euro, tapas relacionadas cun barco naufragado en concreto. Participan nesta ocasión Bar Pinar, Café Bar A Ría, Cafetería Oasis, O Náutico Bar, O Portiño, Taberna do Bico, A Molinera, Bar Rotterdam, Pub Marítimo, Café Bar O Rosquilleiro, Casa Trabeiro, CunKCafé, La Tavernetta da Ponte, Pizzería Brasil, Restaurante-Pizzería A Xunqueira, Parrillada Rojo.

+ NOTICIAS

Comentarios