O City of Agra e o pobo de Camelle, obxecto dun documental
Este verán vivimos o potencial emocional da celebración arredor do naufraxio do City of Agra. Camelle enteiro (a pesar da inoportuna voda) volcábase co programa de actos arredor do 125 aniversario do afundimento do buque británico.
O meirande programa cultural de Galicia arredor dun naufraxio aínda non rematou, e faino en clave documental. Co apoio da Deputación, a compañía Vizuals Lab (que ten en marcha outros proxectos audiovisuais na comarca como o documental “Gnadinger”) está creando un proxecto documental interactivo e multiplataforma sobre o evento.
”City of Agra - Un pobo unido pola traxedia” é o título deste proxecto, que xa avanza no seu desenvolvemento. Traña labor de documentación en colaboración co pobo camellán e co escritor Fernando Patricio Cortizo, e despois de filmar a festa e diversas entrevistas, o proxecto comeza a ver a luz.
Actualmente xa conta con perfís de Instagram @cityofagra.doc e de Facebook “nos que nos van contando a historia do barco e do evento”. E antes de fin deste ano verá a luz unha peza documental que se proxectará en Camelle e despois quedará dispoñible na rede en forma de webdocumental interactivo.
Ademais o proxecto inclúe a creación dunha infografía, o “mapa do suceso” na que se marcan todos os lugares de interese na historia do City of Agra visitados durante o roteiro organizado pola AC Naufraxios Galegos; e un folleto informativo sobre a historia do buque.
Todo este material estará a disposición dos centros educativos da Costa da Morte, e Vizuals organizará presentación nos mesmos.
Novas relacionadas
- Xullo 22: O pobo de Camelle rescatou a súa historia.
- Outubro 21: O pobo de Camelle volcouse co emocionante programa cultural arredor do Naufraxio do City of Agra.
- Inauguración 2021: Camelle dá a benvida á maior conmemoración dos naufraxios galegos polos máis de 124 anos da catástrofe do City of Agra.
- Maio 2019: 122 anos do City of Agra. Camelle recuperou parte da súa historia salgada.
- Miro Villar: Efeméride: 120 anos do naufraxio do «City of Agra» e un poema de Antón Zapata García.
