Mércores. 21.02.2024
El tiempo

O alumnado do IES Pedra da Aguia achégase á realidade política con tres ex parlamentarios

Foto de grupo do IES Pedra da Aguia con Parlamentarios
Foto de grupo do IES Pedra da Aguia con Parlamentarios
O alumnado do IES Pedra da Aguia achégase á realidade política con tres ex parlamentarios

Non para o activo IES Pedra da Aguia da Ponte do Porto. Este ano, ademais do proxecto solidario con Agareso e da súa continua implicación nas actividades en clave europea, recupera as sesións para achegar a realidade política ao alumnado.

Como xa fixeran outros anos, na mañá deste martes, tres exdeputados do Parlamento de Galicia visitaron o IES Pedra da Aguia de Camariñas, unha visita que se enmarca dentro do programa “Coñece as túas institucións” da Xunta de Galicia.

Tercero ESO do IES Camarinas

Marisol Soneira, Angel Mesa e Suso Veiga, veteranos xa nestes campos, representan ás actuais formacións políticas presentes no Parlamento de Galicia e compartiron co alumnado de 3º da ESO as súas experiencias como deputados autonómicos.

Suso Veiga faloulles dos catro niveis que existen na actualidade para a toma de decisións: local, autonómico, estatal e europeo, destacando a coordinación que existe entre todos eles.

A camariñá Marisol Soneira explicou o funcionamento do hemiciclo e destacou o traballo que alí se realiza, xa que gran parte do traballo local depende do que lexisla o parlamento galego.

Por último, Ángel Mesa fixo unha contundente defensa dos políticos, en tempos de tanto ruído como os que estamos a vivir, sinalando que o poder da palabra, a través do diálogo e do debate, debe primar sobre os movementos autoritarios e antidemocráticos que queren corrupto.

Os tres exdeputados remataron a súa intervención incidindo na necesidade de respectar a opinión dos demais, aínda que non sexa do noso agrado, e sobre a educación como arma de progreso para evitar caer en tendencias contrarias ás democráticas.

Marisol Soneira no IES Pedra da Aguia
Marisol Soneira no IES Pedra da Aguia

Do Pazo do Hórreo a Bruxelas

A seguinte parada deste alumnado de 3º da ESO será en decembro, cando teñan que visitar o Pazo do Hórreo, sede do poder lexislativo galego. Será o preludio da viaxe que teñen programada para finais de xaneiro que os levará a coñecer as institucións comunitarias en Bruxelas.

 

Mentres, xa están a traballar no proxecto “activistas polo mundo que queremos” no que terán que crear varios podcasts sobre racismo, medio ambiente, feminismo e realidade LGTBIQ*

Comentarios