O Colexio de Avogados da Coruña alerta do colapso que afecta aos xulgados do partido xudicial de Carballo. Unha situación qyue califican "sen precedentes", o que provoca atrasos que afectan gravemente á cidadanía e dificultan o traballo dos profesionais do dereito.

Poñen posibles causas sobre a mesa, como "a crítica escaseza de persoal e a alta rotación de persoal converteron o funcionamento diario nun escenario caótico".

Enrique de Ron sinala ademais que "a paralización xudicial non é un incidente illado nunha sección específica, senón que afecta aos procedementos procesuais, de investigación, declarativos e de execución. Actualmente, o partido xudicial está a xestionar demandas verbais de case 2 anos de antigüidade que aínda non foron programadas, así como documentos da mesma antigüidade á espera de tramitación".

"A situación é especialmente crítica en tres áreas clave para o funcionamento do sistema de xustiza: a execución, o rexistro e a distribución de casos e as investigacións penais", asegura.

En canto aos procedementos de execución extraxudicial (procedementos legais para esixir o cumprimento forzoso dunha débeda ou obriga) e ás execucións hipotecarias, "prodúcense atrasos de ata un ano e medio só para seren admitidos a trámite, xa que un só funcionario xestiona todos estes casos no partido xudicial".

Unha situación similar existe co rexistro e distribución de casos, onde unha soa persoa é a única responsable de distribuír todas as demandas civís, denuncias e acusacións. Este mesmo funcionario tamén debe compaxinar esta carga de traballo con gardas e a emisión de poderes no xulgado, o que provoca que os casos se atrasen durante meses antes de ser asignados.

Inestabilidade do persoal

Ademais da escaseza de recursos humanos, consideran que "existe unha rotación de persoal extremadamente alta. Os funcionarios que chegan a Carballo adoitan abandonar os seus postos case de inmediato en busca doutras oportunidades. Esta precaria situación vese agravada polo impacto da Lei Orgánica 1/2025 de medidas para a eficiencia do Servizo Público de Xustiza, que, lonxe de racionalizar os procesos, prexudica a capacidade operativa de xulgados como o de Carballo".

Ante esta situación, o Colexio "esixe unha intervención urxente das autoridades competentes para dotar os xulgados de Carballo dun persoal suficiente e estable que permita unha axeitada distribución da carga de traballo e unha tramitación eficiente dos casos, garantindo así unha xustiza rápida e eficaz".