Domingo. 14.07.2024
El tiempo

Os libros en galego volven saír gañadores doutra exitosa Praza dos Libros

Plaza dos Libros de Carballo 2023
Os libros en galego volven saír gañadores doutra exitosa Praza dos Libros

Durante a pasada fin de semana de 6 a 9 de xullo, os libros foron os grandes protagonistas da axenda carballesa. A Praza dos Libros de Carballo, a PLIC, volvía demostrar o bo estado de saúde do papel (para literatura) cun ambiente continuo de cultura sana que trata de animar á lectura e fomentar a literatura galega.

E tras uns días, os libreiros e libreiras da vila veñen de facer valoración das vendas, sacando como principal conclusión que a literatura galega saíu reforzada da Praza dos Libros, na que acaparou o 60% das vendas. Libros locais como “Monte Neme, o olimpo bergantiñán”, do Instituto de Estudos Bergantiñáns, e “As malas mulleres”, de Marilar Aleixandre, foron algúns dos títulos máis demandados. 
Escola de mulleres, Querida Paula e A urna das cartas foron outros títulos galegos ben acollidos polo público. As vendas en castelán destacaron pola variedade de títulos, sobre todo de novela e de literatura infantil e xuvenil. 

As cifras foron boísimas, marcando un novo récord de vendas ao superar os 1.300 exemplares .

Actividades

Plica Carballo 2023

Ao éxito de vendas súmase o de asistencia ás actividades programadas, tanto literarias coma musicais, que encheron os catro días da plic!, un aspecto que destacou tamén a concelleira de Arquivos, Bibliotecas e Normalización Lingüística, Ángeles Pacoret, ademais de aludir expresamente á presentación en sociedade da Escola de Regueifa de Carballo, promovida desde o Servizo de Normalización Lingüística, cunha excelente acollida por parte do público. E todo en perfecta harmonía co mercado do xoves e a feira do domingo, que unha vez máis volveron a integrarse entre as casetas dos libreiros, as mesas dispostas para as sinaturas dos autores e os obradoiros infantís, que tamén os houbo.

Ao longo dos catro días realizáronse unha trintena de actividades, incluído o pregón de María Lado. O xoves e o domingo, precisamente coincidindo coas feiras, foron os días de maior afluencia, como demostra o feito de que tanto as latas de atún Calvo do primeiro día coma os moletes de pan do último se esgotaran en case todas as casetas. As tarxetas-rasca con premios directos tamén tiveron moi boa acollida.

 

Comentarios